Autoridade Zulo husu edukasaun fó atensaun ba programa ensinu rekorrente
KOVALIMA, 17 Outubru 2025 ( TATOLI)- Xefe Suku Zulo, Postu Administrativu Zumalai, Munisípiu Kovalima, João Lopes de Carvalho husu ba servisu edukasaun Kovalima atu fó atensaun masimu programa ensinu rekorrente tanba idozu sira simu pesaun sosiál ne’e sira la asina, maibé nafatin hanehan.
“Ha’u fó sujestaun programa ensinu rekorrente kada tinan Servisu Munisípiu Edukasaun Kovalima prevee orsamentu, maibé realidade ami-nia povu sira ne’e bainhira simu osan pensaun sosiál nafatin sira hanehan de’it ho liman”, Lideransa Komunitária, Suku Zulo, João Lopes de Carvalho hato’o ba jornalista-sira iha Kovalima.
Polítika Ministériu Edukasaun implementa programa ensinu rekorrente realidade hatudu katak idozu sira kontinua sira la hatene asina sira nia naran maibé nafatin hanehan metan tanba ne’e presiza atu hadia.
Hatan ba kestaun ne’e Reprezentante Diretora Servisu Munisipál Edukasaun Kovalima, Gregório Ferreira Afonso, klarifika katak, atu labele halakon programa ensinu rekorrente maibé presiza atu kontrola hamutuk tanba na’in ba programa ne’e maka Prezidente Autoridade munisípiu Kovalima.
“Programa ensinu rekorrente ita muda fatin hanesan bainhira ita-nia inan-aman sira laiha ona atu rejista sira-nia naran entaun ita bele muda ona ba fatin”, nia esplika.
Razaun Autoridade maka na’in ba programa ensinu rekorrente, maske nia orsamentu transfere orsamentu ba iha konta bankaria edukasaun maibé maka autoridade Kovalima.
Tuir dadus formandu husi ensinu rekorrente iha munisípiu Kovalima hamutuk 188 iha nia koordenadór na’in-hitu no nia formadór sira na’in-12.
Fó hanoin fali katak bazeia ba oráriu iha 2024 ne’e, formandu ne’ebé ativa hela prosesu aprendijazen ensinu rekorrente hanesan postu administrativu Suai, Suku Suai-Loro, iha sentru formasaun Akar-Laran , tersa ho kinta , Suku Debos sentru formasaun Lakonak-Babu segunda ho sesta no suku Camnasa sentru formasaun Fatuisin realiza tersa ho sesta, Maucatar suku Matai iha sentru formasaun segunda ho kinta, Suku Holpilat iha sentru formasaun Leogore komesa tersa ho sesta.
Iha postu Zumalai Suku Ucecai iha sentru formasaun Reaçu kuarta no sesta, Suku Zulo iha sentru formasaun Zulo tersa no sesta no Suku Tashilin iha sentru formasaun Bauraikun iha loron segunda no kinta.
Postu Tilomar suku Maudemo, iha sentru formasaun Besac-oan iha loron segunda-kinta , Fatululik , suku Fatululik iha sentru formasaun Beidasi segunda ho tersa, Fohorem , suku Dato-Tolu iha sentru formasaun Fatuk Kabuar Leten segunda no sesta no postu Fatumea iha suku Nanu ,sentru formasaun Macocon tersa ho kinta.
Jornalista:Celestina Teles
Editór:Florencio Miransa Ximenes
