DILI, 17 Outubru 2025 (TATOLI)—Prezidente Konsellu Ezekutivu Bee Timor-Leste, Empreza Públika (BTL, E.P), Gustavo da Cruz hateten, progresu instalasaun barrajen boot husi Mota Glenu no Railaku, Munisípiu Ermera mai Dili presiza tan estudu kle’an tanba iha mudansa ba estrutura rai.
“Iha mudansa polítika ne’e la’ós kansela maibé presiza atu halo tan estudu profundu tanba haree ba kondisaun rai iha ne’ebá, tuir péritu sira husi rai-li’ur mai haree rezultadu estudu viabilidade ne’ebé iha presiza profunda liután estudu ida bolu dezeñu báziku molok hakat ba dezeñu detalladu,” Prezidente BTL, E.P informa ba Ajénsia TATOLI, iha ninia knaar fatin, Sesta ne’e.
Kona-ba hakat ba dezeñu báziku, antes ne’e iha ona diskusaun iha nível topu sira atubele foti desizaun maibé to’o agora BTL seidauk hetan orientasaun ida atu halo diskusaun ba asuntu ne’e.
“Maibé depois iha mudansa IX Governu, ami hetan orientasaun polítika atubele halo alterasaun balun iha estudu ne’e, hanesan halo kaptasaun ba bee-moos iha fatin rua ita bolu Bee-Moos II no Fatisi, kaptasaun ne’e sei lori bee ho kuantidade litru 550 pur segundu mai Dili,” nia akresenta.
Notísia relevante : BTL, E.P aprezenta ona rezultadu estudu viabilidade dada bee husi Railaku ba KAFI
Tuir nia, proposta ne’e hetan ona orientasaun, nune’e iha tempu besik ekipa responsável sira sei aprezenta iha Konsellu Administrasaun Fundu Infraestrutura (KAFI) hodi hetan konsiderasaun atu hahú halo ona dezeñu detalladu.
“Kona-ba dezeñu detalladu ne’ebé ita sei halo ba kaptasaun Bee-Moos II no Fatisi, iha esperativa orsamentu hamutuk millaun $3 ka $4. Tuir orientasaun tenke aselera nune’e meadu tinan oin bele hahú halo implementasaun, ida-ne’e agora mak ami aselera hela,” nia katak.
Dezeñu detalladu ne’e halo sei liuhusi konkursu públiku, ne’ebé liga ho investimentu boot bele loke ba empreza internasionál.
Kaptasaun bee ne’e atu liga ho projetu melloramentu sistema Dili West Water System nian, ne’ebé mak fundu mai husi empréstimu husi Banku Dezenvolvimentu Aziátiku (ADB).
Antes ne’e, Governu liuhusi Ministru Obra Públika, Salvador Eugénio Soares dos Reis Pires (Governu anteriór), asina iha loron 22 Agostu 2019, kontratu ho empreza internasionál husi Tailándia no Koreia atu halo estudu pré-viabilidade no estudu viabilidade ba projetu dada bee-moos husi mota Railaku no Glenu, munisípiu Ermera mai Dili.
Empreza ne’e maka Team Consulting Engineer and Management PCL, Thailándia in JV With ATT, Consultations Company Limited, Association With Thailand and in CQ2, Engineering Consultancy ne’ebé konsórsiu ho empreza Diversu Unipessoal, Lda, inklui Dognsung Enegineering Co. Ltd, Korea and in Association, ne’ebé konsórsiu ho empreza Kai Watu Kmanek Consultant Unipessoal, Lda.
Empreza rua ne’e manán konkursu públiku liuhusi prosesu Komisaun Nasionál Aprovizionamentu (CNA, sigla portugés) ho orsamentu millaun $1, ho durasaun estudu hahú husi Agostu 2019 to’o Janeiru 2020 (durante fulan-lima) ho distánsia kilómetru 30-resin husi Ermera mai Dili.
Iha loron 13 Fevereiru 2025, Ministru Obra Públika, Samuel Marçal, informa katak Empreza koreana Dongsung Enegineering Co. Ltd, finaliza ona estudu viabilidade ba projetu dada bee-moos husi mota Railaku no Gleno, munisípiu Ermera mai Dili, informa Ministru Obra Públika, Samuel Marçal.
Jornalista : Arminda Fonseca
Editora : Julia Chatarina
