Janeiru-Setembru, LNEC halo ona teste ba materiál konstrusaun 1.000-resin
DILI, 17 Outubru 2025 (TATOLI)—Xefe Koordenadór Jerál Laboratóriu Nasionál Enjinéria Sivíl (LNEC, sigla portugés) iha Ministériu Obra Públika, Jony Rodrigues Varela, informa hahú husi Janeiru to’o Setembru ne’e, sira halo ona teste ba materiál konstrusaun hamutuk 1.000-resin.
“Bazeia ba pedidu ne’ebé ami simu husi kompañia sira-ne’ebé atu halo projetu konstrusaun nian no husi pedidu ne’ebé iha kuaze ami finaliza ona balun. Husi pedidu sira-ne’e barak-liu mak ami halo teste ba iha besi beton nian ne’ebé liga liu ba projetu emerjénsia, fundu infraestrutura PDIEM no seluk tan,” Koordenadór Jerál informa ba Agência Tatoli iha nia kna’ar fatin, ohin.
Dirijente ne’e afirma, ekipamentus ne’ebé sira uza dezde laboratóriu ne’e harii to’o agora entaun balun ho kondisaun ne’ebé aat ona, presiza halo manutensaun hodi ajuda servisu teste materiál konstrusaun nian.
“Ita iha ekipamentu modelu oin lima (5) hodi halo teste ba besi beton, teste ba rai, teste ba alkatraun, halo teste ba bronjon no mós teste ba besi nian,” nia hateten.
Maibé, nia garante katak antes tama ba tinan 2026 ne’e, sira sei finaliza hotu ona teste materiál hirak ne’e hodi prepara alista ba relatóriu anuál nian.
Enkuantu hahú husi Janeiru to’o Setembru ne’e, reseita ne’ebé sira arrekada ba kofre Estadu hamutuk $351.991,000 ne’ebé kompostu husi fulan-Janeiru ho totál reseita $20.813,00, Fevereiru $24.919,00, Marsu $24.524,00, Abríl $34.635,00, Maiu $31.986,00, Juñu $29.391,00, Jullu $41.899,00, Agostu $ 77.789,00 no Setembru hamutuk $60.349,00.
Jornalista : Alexandra da Costa
Editór : Cancio Ximenes
