DILI, 17 Outubru 2025 (TATOLI)–Tribunál Judisiál Primeira Instánsia Dili (TJPID), Sesta ne’e, kontinua realiza julgamentu ba Arguidu José dos Santos Naimori Bukar, Arguida Armada Berta dos Santos inklui Arguidu Mário do Rosário Mesquita.
Iha ajenda julgamentu ne’e, Juíz singulár Julmiati Freitas ajenda kedan ba faze alegasaun.
Iha alegasaun, Ministériu Públiku (MP) ne’ebé reprezenta husi Rafael Gusmão solisita ba Tribunál singulár, atu aplika pena multa hanesan ba arguidu na’in-tolu, relasiona ho kazu subvensaun ba Partidu Kmanek Haburas Unidade Nasionál Timoroan (KHUNTO).
Prokuradór, Rafael Gusmão deklara katak, razaun MP husu ba Tribunál atu aplika pena multa ba aguidu na’in-tolu tanba maski Arguidu na’in-rua José dos Santos Naimori Bukar no Armanda Berta dos Santos hili direitu nonok, maibé Arguidu Mário do Rosário Mesquita konfesa ba faktu.
Tanba ne’e, bazeia ba deklarasaun husi arguidu na’in-ida ne’emós sasin sira ne’ebé arrola, komprova mós ho dokumentu ne’ebé konsta iha akuzasaun, ho nune’e mak MP husu Tribunál atu aplika pena multa ba arguidu na’in-tolu.
“Ba Arguidu José dos Santos Naimori Bukar aplika pena multa ho valór osan $5.000, Arguida Armanda Berta dos Santos selu pena multa ho osan valór $5.000, no Arguidu Mário do Rosário Mesquita tenke selu pena multa ho osan $5.000. Husi sira na’in-tolu hamutuk selu pena multa ho osan $15.000,” deklara Prokuradór Rafaek iha nia alegasaun, iha sala julgamentu.
Notísia relevante : Tribunál julga Naimori no arguidu na’in-rua seluk
Enkuantu, Defeza husi arguidu sira, Advogadu Privadu Ismael Assuncao Lopez deklara katak, antes ne’e iha julgamentu, Arguidu na’in-rua hili direitu silénsiu no Arguidu Mário Mesquita maka hili direitu ko’alia.
Arguidu deklara, momentu ne’ebá arguidu halo duni relátoriu, maibé rekoñese iha erru balun, tanba foin ba dahuluk halo relátoriu, ne’ebé Partidu KHUNTO nu’udar partidu foun ida tanba seidauk iha esperiénsia atu halo relatóriu ida feitu.
Advogadu Privadu ne’e fundamenta tan katak, prazu ne’ebé Komisaun Nasionál Eleisaun (CNE,sigla portugés) fó ba arguidu, nia konsege justifika relátoriu ne’ebé iha maibé la klaru, nune’e ikus mai akontese nune’e.
Defeza deklara, arguidu sira devolve ona osan $7.000, tanba ne’e husu Tribunál atu tetu sirkunstánsia sira ne’e hotu, atu aplika pena ne’ebé justu ba nia kliente sira.
Iha ne’e, Defeza mós husu Tribunal singulár ne’e atu notifika ba CNE hodi devolve hikas osan subvensaun partidu KHUNTO nian, ne’ebé suspende iha tinan 2022 to’o iha tinan 2023.
Hafoin Tribunál rona tiha parte hotu iha faze alegsaun, Tribunál liuhusi Juiza Julmiati Freitas ne’ebé prezide prosesu ne’e marka fali ba loron 27 Outubru 2025 tuku 9:0 hodi rona leitura senteza ba kazu ne’e.
Audiénsia julgamentu ne’e prezide husi Juíz singulár Julmiati Freitas, MP reprezenta husi Prokuradór Rafael Gusmão no Arguidu sira hetan asisténsia legál husi Advogadu Privadu Ismael Assuncao Lopez no Agostino de Jesus.
Jornalista : Natalino Costa
Editora : Julia Chatarina
