Autoridade lokál kestiona servisu estensionista iha Suku Ogues no Beco
KOVALIMA, 18 Outubru 2025 ( TATOLI)- Xefe Suku Ogues husi postu administrativu Maukatar no Xefe Suku Beco husi postu Suai, kestiona servisu funsionáriu estensionista-sira iha suku tanba servisu landu másimu atu promove produtu lokál iha kada suku.
Xefe Suku Oegues, Febriano Pereira informa Governu koloka funsionáriu estensionista ba iha kada suku sira,maibé realidade estensionista sira hela la metin iha suku sira ne’ebé maka presta sira-nia servisu hodi fó asisténsia tékniku ba agrikultór iha suku.
“Ha’u nia preokupasaun kona-ba prezensa funsionáriu estensionista iha suku, ita-boot sira koloka kada suku estensionista ida,oinsá sira-nia servisu tanba estensionista la hela metin iha suku ne’ebé maka sira presta servisu”, Xefe Suku Febriano Pereira hato’o ba jornalista sira iha Kovalima.
Lideransa Komunitária kestiona tanba realidade kolokasaun estensionista iha suku Ogues postu Maucatar hela iha Salele área husi postu administrativu Tilomar oinsá maka sira bele halo servisu ne’ebé ho di’ak atu atende komunidade sira
Iha sorin seluk , Xefe Suku Beco postu administrativu Suai, Arlindo Bernardino Lemos, mós nafatin kestiona servisu funsionáriu husi esténsionista sira tanba durante ne’e estensionista servisu ladun másimu
“ Ha’u hakarak hato’o ha’u nia preokupasaun kona-bá kolokasaun funsionáriu estensionista-sira ne’ebé koloka iha suku sira servisu ladun másimu, nune’e presiza atu haree di’ak liu lalika koloka estensionista tanba servisu ladun di’ak”, nia reforsa.
Responde preokupasaun, Diretór Servisu Munisipál Agrikultutura Kovalima,Lino Magno , rekoñese ho nune’e Servisu munisipál agrikultura Kovalima tau ona planu atu halo rekrutamentu ba funsionáriu estensionista sira nune’e bele halo kolokasaun .
“planu ita halo rekrutamentu nune’e atu haree ba funsionáriu ne’ebé maka moras halo sira deskansa no ba sira ne’ebé maka idade 60-baleten tama iha lista reforma “. nia klarifika
Tuir dadus iha servisu munisipál Agrikultura Kovalima funsionáriu estensionista hamutuk 30 husi númeru ne’e kada suku koloka estensionista na’in-ida ho nia koordenadór na’in-hitu.
Servisu munisipál Agrikultura Kovalima mos iha ona planu atu halo rekrutamentu funsionáriu estensionista hamutuk 30 kompostu husi tekniku veterináriu no tékniku enjineiru sivíl .
Jornalista:Celestina Teles
Editór: Florencio Miranda Ximenees
