VIKEKE, 20 Outubru 2025 (TATOLI)—Xefe Suku Uaimori, Postu Administrativu Vikeke Vila, Munisípiu Vikeke, Francelino António Gomes husu Servisu Ministériu Agrikultura, Peska, Pekuária no Floresta (SMAPPF) Munisípiu Vikeke sosiliza kona-ba prosesu hasai lisensa tesi ai ba populasaun sira tanba populasaun balun seidauk iha koñesimentu.
“Ha’u husu Diretór SMAPPF Vikeke atu halo sosializasaun relasiona ho tesi ai nian ba ita-nia komunidade nune’e komunidade bele hatene prosesu tesi ai. Komunidade barak seidauk hatene kona-ba prosesu hasai lisensa,” Francelino hateten ba TATOLI iha resintu Administrasaun Munisípiu Vikeke, Segunda ne’e.
Autoridade Uaimori ne’e haktuir katak daudaun ne’e komunidade atu tesi ai-kakeu hun ida de’it mós hasai lisensa hafoin tesi, tanba ne’e presiza halo sosializasaun ba komunidade iha suku atu komunidade bele komprende.
“Se la halo sosializasaun ba komunidade, oinsá trata dokumentu lisensa tesi ai nian,” nia esklarese.
Hatán ba preokupasaun ne’e, Diretór SMAPPF Vikeke, Olívio Soares Freitas haktuir, kona-ba sosializasaun ne’e, Autoridade Uaimori aprezenta ona ba parte Diresaun Floresta Nasionál.
“Kona-ba sosializasaun tesi nian ami aprezenta ona ba Diresaun Floresta atu haree asuntu ida-ne’e hodi halo sosilizasaun ba ita-nia komunidade. Bele tesi ai, maibé tenke iha kintál rasik. Kuandu fora husi kintál, ida-ne’e tenke selu taxa no hasai lisensa. Tanba ai sira-ne’ebé fora husi kintál ne’e Estadu nian ne’ebé selu taxa ba Estadu,” nia informa.
Jornalista: Vitorino Lopes da Costa
Editór: Xisto Freitas da Piedade
