DILI, 20 Outubru 2025 (TATOLI)—Estudante Eskola Sekundária Jerál 04 Setembru UNAMET Balide na’in-ida la tuir ezame nasionál iha loron dahuluk, entretantu iha eskola FINANTIL na’in-17.
Diretór Eskola Sekundária Jerál 04 Setembru UNAMET Balide, Sergio da Cruz, hateten iha loron dahuluk ezame nasionál iha 04 Setembru UNAMET Balide, haruka fila estudante feto ida tanba nia laiha dokumentu.
Diretór Eskola Sekundária Jerál 04 Setembru UNAMET Balide, Sergio da Cruz, hateten iha loron dahuluk ezame nasionál iha 04 Setembru UNAMET Balide, haruka fila estudante feto ida tanba nia laiha dokumentu.
“Ohin iha estudante feto ida durante ne’e la tuir prosesu aprendizajen derepente mosu hakarak atu tuir ezame nasionál, maibé ami haree ninia dokumentu laiha. Keta nia laiha diploma ensinu báziku, entaun ami la autoriza nia tuir ezame,” Sergio da Cruz dehan ba jornalista sira iha nia kna’ar fatin, Balide, Dili, Segunda ne’e.
Tuir nia katak durante prosesu aprendizajen iha saladeaula désimu-segundu nian, nunka haree estudante ne’e.
“Ita hein ezame nasionál ne’e ramata mak foin hatane estudante hira mak tuir no hira mak la tuir. Maibé, atu dehan ohin loron buat hotu-hotu la’o di’ak,” nia haktuir.
Estudante Eskola 04 Setembru UNAMET ne’ebé tuir ezame nasionál hamutuk 1.027 no uza saladeaula hamutuk 26.
Entretantu, Adjuntu Eskola Sekundária Jerál (ESJ) FINANTIL, Sabino Ernesto, afirma estudante nain-17 iha ESJ FINANTIL la tuir ezame nasionál tanba dokumentu la kompletu.
“Estudante sira-ne’e nia lista iha, maibé labele tuir ezame tanba dokumentu mak la lori mai hodi kompleta hanesan diploma. Nune’e, la autoriza atu tuir ezame nasionál. Karik sira lori sedu mai sira bele tuir ezame nasionál ba segunda xamada,” Sabino informa.
Nia hatutan, totál estudante ne’ebé tuir ezame nasionál hamutuk na’in-585 kompostu husi Siénsia Teknolojia (CT-sigla portugeza) hamutuk na’in-333 no Siénsia Sosiál no Umanidade (CSH-sigla portugeza) hamutuk na’in-252. Sala ezame hamutuk 30, ba CT 17 no CSH 13, kada sala enkaixa estudante hamutuk na’in -40, na’in-20 husi CSH no na’in-20 husi CT.
Jornalista: Osória Marques
Editór: Xisto Freitas da Piedade
