Estudante finalista na’in-3.397 partisipa ezame nasionál
VIKEKE, 20 Outubru 2025 (TATOLI)—Estudante finalista ba tinan 2025 kompostu husi ensinu báziku jerál, ensinu sekundáriu jerál no ensinu sekundáriu tékniku vokasionál hamutuk na’in-3.397, Segunda ne’e, partisipa ezame nasionál.
“Ha’u dezeju ba estudante sira-ne’ebé partisipa iha ezame nasionál atu aproveita ezame nasionál ne’e ho di’ak. Tanba estudante sira-ne’e prepara durante tinan ida no simu matéria husi sira-nia manorin sira husi ensinu báziku no sekundáriu,” Reprezentante Ministériu Edukasaun (ME) atuál Prezidente INFORDEPE, Domingos Martins hateten ba jornalista sira hafoin ramata halo abertura ezame nasionál iha Vikeke.
Domingos informa ezame nasionál ida-ne’e bainhira estudante finalista sira la konsege partisipa, sei iha ezame daruak ba estudante sira-ne’ebé moras no difikuldade seluk ne’ebé la permite partisipa ezame nasionál.
“Bazeia ba nórma ne’ebé ita iha, estudante ne’ebé naran tama ona iha lista ezame, maibé la konsege partisipa ezame nasionál, sira iha segunda xamada,” nia hato’o.
Iha fatin hanesan, Diretór Servisu Edukasaun Munisípiu Vikeke, Júlio Sakadura haktuir ezame nasionál ne’e nu’udár programa nasionál nune’e eskola hotu-hotu ohin realiza ezame husi nivel ensinu báziku, sekundáriu jerál no ensinu tékniku vokasionál.
“Ita hotu akompaña ohin eskola sira iha munisípiu Vikeke realiza hotu ezame nasionál. Ezame ne’e programadu ona. Karik iha ezame ne’e mak estudante balun la partisipa hanesan moras sei tuir ezame faze daruak,” Sakadura tenik.
Nia hatutan Servisu Edukasaun Munisípiu Vikeke kontinua halo monitorizasaun ba ezame ne’e nune’e ezame ba tinan ida-ne’e la’o di’ak to’o ramata.
Enkuantu, tuir dadus, estudante Munisípiu Vikeke ne’ebé partisipa iha ezame nasionál totál hamutuk na’in- 3.397 kompostu husi ensinu báziku 1.713, ensinu sekundáriu jerál 1.388 no ensinu sekundáriu tékniku vokasionál 296.
Jornalista: Vitorino Lopes da Costa
Editór: Xisto Freitas da Piedade
