MKI sensibiliza informasaun ba emprezáriu kona-ba esportasaun no importasaun
KOVALIMA, 15 Outubru 2025, (TATOLI)-Ministériu Komérsiu Indústria, sensbiliza informasaun ba emprezáriu sira iha Kovalima kona-ba prosedimentu legál esportasaun no importasaun.
Ministériu Komérsiu Indústria sensibiliza dekretu-lei númeru 30/2011 ne’ebé altera ba dekretu-lei númeru 74/2022 iha artigu 3 ko’alia kona-ba importasaun ba viatura karreta no motor mai Timor-Leste ninia tinan produsaun labele liu ona tinan lima ba leten.
No diploma ministeriál númeru 3/2024, 29 marsu, diploma ministeriál númeru 1/2019 , 18 Setembru ko’alia kona-ba atividade esportasaun no importasaun.
“Ohin ita mai hamutuk iha ne’e atu partilla informasaun kona-ba lei importadór sira-ne’ebé maka aprezenta husi ekipa tékniku komérsiu husi nasionál maka halo aprezentasaun,” Diretora Ministériu Komérsiu Indústria Kovalima, Bernadete de Jesus Inacia, hateten iha salaun IADE, Kovalima.
Governu konsidera programa sensibilizasaun informasaun ne’e importante hodi fasilita empreza sira atu komprende kle’an kona-ba prosedimentu legál sira ne’ebé regula atividade importasaun no esportasaun sasán tama no sai iha territóriu Timor-Leste no Indonézia.
“Matéria ko’alia kona-ba esportasaun no importasaun, sai ona pilár merkadória ne’ebé maka uza hodi halo tranzasaun husi nasaun ida ba nasaun sira seluk, tanba ne’e presiza iha koñesimentu kona-ba prosedimentu legál,” tenik tan.
Iha fatin hanesan Reprezentante Autoridade Munisípiu Kovalima, Sérgio da Cunha Moniz, reforsa programa sensibilizasaun ne’e importante atu nune’e emprezáriu sira bele kumpre regras kona-ba atividade importasaun no esportasaun iha futuru.
“Atividade ohin loron ita ko’alia esporta no importa tenke tuir baze legál no forma legál, ne’ebé maka iha atu nune’e ita Kovalima hodi halo prepara aan nune’e labele importa de’it oinsá ita-nia empreza lokál no parseiru sira atu esporta,” nia dehan.
Jornalista : Celestina Teles
Editór : Florencio Ximenes
