DILI, 20 Outubru 2025 (TATOLI) – Parlamentu Nasionál (PN) aprova ona pedidu dezlokasaun ofisiál Prezidente Repúblika (PR), José Ramos-Horta, bá Doha, Katár no Santa Sé iha fulan Novembru tinan ne’e.
Pedidu Xefe Estadu nian bá Doha, Katár entre loron 04 to’o 06 Novembru hodi partisipa Simeira Mundiál daruak kona-ba Dezenvolvimentu Sosiál, hodi responde ba konvite Alteza, Sheikh Tamim bin Hamad Al Thani, no mós partisipa reuniaun dahuluk Líder Aliansa Globál kontra Hamlaha no Ki’ak.
Nune’e mós Xefe Estadu bá Santa Sé, Vátikanu entre 17 to’o 23 Novembru hodi halo audiénsia ho Sua Santidade Papa Leão XIV, iha loron 21 Novembru.
“Rezultadu votasaun a-favór 45, kontra ida no abstensaun lima. Nune’e autoriza husi Parlamentu ba (Prezidente Repúblika) ninia vizita,” Prezidente Parlamentu Nasionál, Deputada Maria Fernanda Lay, fó-sai liuhusi reuniaun plenária iha Parlamentu, segunda ne’e.
Bibán ne’e Xefe Estadu informa mós ninia dezlokasaun privadu ba Jakarta, Indonézia entre 09 até 11 Novembru hodi partisipa sesaun enseramentu World Peace Forum bá da-sia ho tema Considering Wasatiyyat and Tionghua for Global Collaboration, responde ba konvite Prezente Sentru Diálogu Kooperasaun Sibilizasaun (CDCC, siglá inglés) no Prezidente World Peace Forum.
Informa mós vizita privada ba Perth, Austrália hodi partisipa iha palestra Australian Institute of International Affairs for Western Austrália (AIIA-WA) iha okazisaun komemorasaun akontesimentu 1975 períodu envolve proklamasaun subsekente instabilidade, prevista iha 04 Novembru, inklui períodu ferias entre 29 Novembru até 03 Dezembru 2025.
Nune’e sei fila hikas mai Timor-Leste iha loron 05 Dezembru.
Jornalista: Nelson de Sousa
Editór: Evaristo Soares Martins
