Edukasaun Kovalima submete pedidu levantamentu orsamentu konsesaun eskolár
KOVALIMA, 21 Outubru 2025 ( TATOLI) – Servisu Edukasaun Munisípiu Kovalima, submete ona pedidu atu halo levantamentu ba orsamentu konsesaun eskolár faze daruak , durante fulan-lima iha finansa munisípiu.
“Orsamentu konsesaun eskolár ba faze daruak daudaun ne’e prosesu hela iha banku hein de’it ona eskola sira atu foti osan konsesaun eskolár iha banku”, Diretór Servisu Munisípiu Edukasaun Kovalima, Elda de Fátima relata ba TATOLI,iha Santa Rosa.
Dirijente ne’e, dehan orsamentu konsensaun eskolár ba faze daruak ne’ebé orsamentu ba eskola ensinu báziku rihun $143, eskola pre-eskolár 7,572 hein halo prosesu atu foti de’it ona iha banku, nune’e eskola sira bele uza ba nesesidade eskola nian.
Prosesu konsesaun eskolár ba 2025 ne’e durante fulan 11, tanba prosesu konsesaun eskolár faze ba dahuluk ba fulan-neen ne’ebé maka nia utilizasaun eskola ensinu báziku no eskola pre-eskolár sira submete ona relatóriu utilizasaun orsamentu konsesaun eskolár ba faze dahuluk hamutuk $185,765
Ho nune’e, maka Servisu Munisipál Edukasaun Kovalima daudaun kontinua submete ona pedidu halo prosesu orsamentu konsesaun eskolár ba eskola sira ba fulan-lima ni’an.
Orsamentu konsesaun eskolár nia utilizasaun ne’e, atu hadi’a edifísiu eskola sira ne’ebé maka nia odamatan no janela sira aat, utilizasaun ba atividade alunu, profesór no sosa materiál ATK eskola sira
Fo hanoin fali katak, Ministériu Edukasaun (ME), atribui konsesaun eskolár ba eskola fahe ba kategória hanesan ba eskola pre-eskolár bazeia dekretu-lei númeru 84, artigu 7 ne’ebé altera husi dekretu-lei númeru 3/2016 kona-bá estatutu administrasaun munisipál no atribui konsesaun eskolár ba ensinu báziku tuir dekretu-lei númeru 32/2023, artigu 69 kona-ba gastu orsamentu konsesaun eskolár tuir nesesidade eskola.
Governu atribui konsesaun eskolár fahe ba kategória hanesan, konsesaun eskolár ba ensinu pre-eskolár ne’ebé responsabiliza husi munisipál ho nia orsamentu kada estudante $0.75 no konsesaun eskolár ba ensinu báziku reponsabiliza ba Ministériu Edukasaun ho nia orsamentu kada estudante $2.00.
Tuir dadus estudante ensinu pre-eskolár públiku ba tinan 2024 hamutuk 1,604 ne’ebé nia orsamentu ba fulan-neen hamutuk $7,812.00 husi orsamentu inisiál $15,705.00 no alunu ensinu Báziku direitu ba konsesaun eskolár husi eskola BEC 20 ho nia filiál 63 hamutuk 14,174 ho totál orsamentu hamutuk $170,088.00.
Notisia relevante: Edukasaun Kovalima rejista estudante 2.000 preparadu tuir ezame Nasionál
Jornalista:Celestina Teles
Editór:Florencio Miranda Ximenes
