DILI, 21 Outubru 2025 (TATOLI)—Orsamentu Jerál Estadu (OJE) 2026 ne’ebé aloka ba Autoridade Munisipál Baukau hetan redusaun iha rúblika Saláriu no Vensimentu inklui Kapitál Dezenvolvimentu.
Prezidente Autoridade Munisipál (PAM) Baukau, Veneranda Eurico Lemos Martins hato’o kestaun ne’e bainhira hamutuk ho Ministériu Administrasaun Estatal (MAE) iha audénsia públika ho Komisaun C no G iha Parlamentu Nasionál (PN) kona-ba variedade Orsamentu Jerál Estadu (OJE) 2026 kompara ho 2025 iha-ne’ebé husu razaun mós orsamentu husi munisípiu balun aumenta no redús.
“Iha Komisaun Revizaun Orsamentál (KRO) mak deside hafoin tetu kona-ba orsamentu ne’ebé ligadu ho programa ne’ebé prioridade atu halo iha tinan oin. Entaun, ita hetan korte ba Saláriu no Vensimentu no Kapitál Dezenvolvimentu,” Prezidente Autoridade Munisipál Baukau informa ba TATOLI iha edifisiu Ministériu Finansa (MF), Aitarak-Laran, Tersa ne’e.
Autoridade Munisipál Baukau propoin orsamentu adisonál hamutuk $16.507.353 ho razaun OJE tinan-2025 sofre ona korte ba Saláriu no Vensimentu hamutuk pursentu 16 nune’e husu repoin fali nune’e bele paga funsionária sira hamutuk na’in-308.
Munisipál Baukau hetan alokasaun tetu fiskál hosi Ministériu Finansa ho montante $10.388.011 hodi aloka ba Saláriu no Vensimentu $2.363.048, Kapitál Menór $0, Kapitál Dezenvolvimentu 0, Transferénsia Públika $7.445.580 no Bens no Servisu $579.383.
“Ha’u só bele halo komentáriu detallu kona-ba orsamentu korte bainhira tama ona ba debate jeneralidade iha Parlamentu Nasionál,” Veneranda Lemos akresenta.
Husi orsamentu tetu fiskál referidu, AM Baukau konsidera la sufisiente nune’e propoin tan orsamentu adisionál $16.507.353 ne’ebé sei aumenta ba alokasaun Saláriu no Vensimentu $2.173.093, Kapitál Menór $2.341.995, Transferénsia Públika $1.005.826, Kapitál Dezenvolvimentu $10.716.071 no Bens no Servisu $270.378.
Entretantu, totál orsamentu ne’ebé Autoridade Baucau propoin ba KRO hamutuk $26.896.364, hodi hodi aloka ba Saláriu no Vensimentu $4.536.141, Kapitál Menór $2.341.995, Transferénsia Públika $8.451.406, Kapitál Dezenvolvimentu $10.716.071 no Bens no Servisu $849.761.
Jornalista: Natalino Belo
Editór: Xisto Freitas da Piedade
