Sarkozy sai hanesan eis-prezidente fransés dahuluk ne’ebé mak tama kadeia
DILI, 21 Outubru 2025 (TATOLI) – Eis-prezidente fransés, Nicolas Sarkozy, ofisialmente hetan prizaun hodi kumpri kastigu tinan lima tanba akuzasaun ‘konspirasaun kriminál’ iha kazu ida ne’ebé envolve ninia finansiamentu líbiu ba ninia kampaña prezidensiál iha tinan 2007.
Sarkozy to’o ona iha kadeia La Sante, iha Paris, iha loron-tersa (21 Outubru), halo nia sai hanesan eis-prezidente fransés dahuluk ne’ebé tama iha prizaun formál, haktuir hosi BFM TV.
Liu ema na’in-100 halibur besik nia rezidénsia hodi hatudu apoiu, bainhira Sarkozy nia advogadu, Christophe Ingrain, hatete ba BFM TV katak pedidu ida ba nia libertasaun sei aprezenta lalais tebes.
Ingrain konfirma mós katak Sarkozy provavelmente sei hetan detensaun durante semana tolu to’o fulan ida antes tribunál rekursu foti desizaun.
Molok sai hosi nia uma, Sarkozy fahe mensajen ikus ida iha plataforma mídia sosiál X, hodi promete atu kontinua denunsia saida maka nia bolu hanesan ‘eskándalu judisiál’.
“Ha’u sei kontinua denunsia eskándalu judisiál ida-ne’e, susar aat ida ne’ebé ha’u hasoru durante tinan sanulu-resin. Ida-ne’e kazu finansiamentu ilegál ida lahó finansiamentu ruma. Investigasaun naruk ida-ne’e hahú bazeia ba dokumentu sira ne’ebé nia falsidade agora prova ona,” nia hakerek.
Sarkozy subliña katak nia la husu tratamentu espesiál ka indultu.
“Ohin dadeer ha’u sente laran-susar maka’as ba Fransa, ne’ebé hetan umillasaun hosi hahalok vingansa ne’e ne’ebé hasa’e ódiu ba nível sira ne’ebé laiha presedente. Ha’u laiha dúvida katak lia-loos sei manán. Maibé folin aas saida maka sei selu,” nia hatutan.
Sarkozy hetan kondenasaun ba tinan-lima iha kadeia iha fulan liubá tanba konspirasaun kriminozu relasionadu ho finansiamentu hosi nia kampaña iha tinan 2007 hosi Líbia.
Tribunál konsidera Sarkozy kulpadu ba konspirasaun kriminál maibé absolve nia hosi korRupsaun pasivu no akuzasaun finansiamentu ilegál sira seluk.
Sarkozy eleitu nu’udar Prezidente Fransa nian iha tinan 2007 no hala’o knaar to’o tinan 2012.
Fonte: Reutes/Anadolu/Antaranews
