Bobonaru sei mobiliza populasaun rihun 2 festeza adezaun TL ba ASEAN

BOBONARU, 22 Outubru 2025 (TATOLI) – Autoridade Munisípiu Bobonaru (AMB) sei mobiliza komunidade no estudante hamutuk rihun 2 husi postu administrativu neen hodi festeza adezaun Timor-Leste (TL) sai membru plenu Asosiasaun Nasaun Sudeste Aziátiku  (ASEAN, sigla inglés) iha loron 26 fulan-Outubru 2025.

Prezidente Komisaun Organizadora ba selebrasaun adezaun TL ba ASEAN iha munisípiu Bobonaru, Domingos da Costa, informa komisaun mós fó ona orientasaun ba Administradór Postu Administrativu Maliana atu serbisu hamutuk ho Sekretariadu Tékniku Administrasaun Eleitorál atu aviza komunidade sira partisipa mós iha eventu importante ne’e hodi akompaña serímonia ofisiál ne’e iha ekran ne’ebé komisaun sei prepara.

Komisaun mós daudaun prepara ona konvite atu distribui ba ema importante sira. “Ita-nia orsamentu la sufisiente atu mobiliza ema barak ne’e mak kada postu karreta rua ou tolu de’it, tau tan ho Maliana ami target komunidade bele to’o rihun 2”, nia informa ba Tatoli, ohin.

Atuál Sekretáriu Autoridade Munisípiu Bobonaru ba Asuntu Administrasaun no Finansa ne’e relata katak komisaun mós hetan kamizola rihun 5-resin husi Governu no dadaun ne’e distribui ona ba kada postu atu fahe ba komunidade atu uza iha loron selebrasaun.

Domingos da Costa fó sai sekuénsia ba selebrasaun festa ne’e katak, tuir orientasaun husi nasionál, sei realiza atividade divertimentu hanesan tebe tradisionál, likurai, dahur ne’ebé sei aprezenta husi kada postu to’o tuku 17h:30, ne’ebé sei hala’o iha kampu futeból Maliana.

Aleinde ne’e, sei fó oportunidade mós ba foinsa’e sira ne’ebé iha interese atu aprezenta poezia hodi espresa sira-nia sentimentu ba Timor-Leste nia adezaun ba membru permanente ASEAN.

“Mai ita kontente no haksolok hamutuk, tanba Timor-Leste bele tama ona ba ASEAN. Ida-ne’e loron importante no istóriku mai ita”, nia apela.

Autoridade Bobonaru hetan alokasaun orsamentu $7,500 husi Ministériu Administrasaun Estatál hodi selebra loron importante ne’e.

Lembra katak iha Simeira ASEAN ba da-46 iha Kuala Lumpur, Malázia, líder hotu-hotu fó apoiu tomak ba Timor-Leste atu adere ba ASEAN no Timor-Leste nia adezaun ba membru plenu ne’e sei ofisializa iha simeira ASEAN ba da-47 ne’ebé sei realiza iha 26 Outubru iha nasaun referida.

Notisía relevante: Povu Vikeke nia lian ba adezaun Timor-Leste ba ASEAN

Jornalista: Sergio da Cruz

Editora: Maria Auxiliadora