DILI, 22 Outubru 2025 (TATOLI) – Ekipa Bee Timor-Leste, Empreza Públika (BTL, E.P), halo hela levantamentu dadus ba rekursu bee iha postu administrativu Laulara, munisípiu Aileu, hodi implementa projetu melloramentu sistema bee-moos.
Prezidente Konsellu Ezekutivu, Gustavo da Cruz, rekoñese kata komunidade iha Laulara, inklui Eskola Bázika Sentrál (EBC) 3.⁰ siklu Laulara preokupa ho bee-moos no BTL hatama ona planu ne’e ba tinan oin.
“Iha Laulara nian ita hatama hela ba planu ba investimentu iha kapitál postu sira. Ami hatene katak Laulara bee mai husi Remexiu dook loos, entaun ami halo hela levantamentu dadus ba rekursu bee Laulara nian. Espera katak tinan oin ne’e ita bele implementa projetu melloramentu sistema bee-moos iha postu ne’e, tanba difikuldade ida mak bailoro ne’e bee laiha”, Gustavo da Cruz dehan ba Tatoli, ohin.
Nia hateten daudaun ekipa kontinu halo peskiza ba fonte bee no nia parte rasik sei orienta diretór sira bá halo observasaun iha EBC Laulara, nune’e tinan oin implementa projetu ba melloramentu sistema bee-moos kapitál postu nian, eskola mós sai benefisiáriu hotu.
Implementasaun projetu melloramentu sistema bee-moos ne’e halo iha kapitál postu administrativu nian iha territóriu nasionál hamutuk 53, inklui mós postu foun ne’ebé Minitériu Administrasaun Estatál foin dezenvolve hanesan Matebian, Kelikai no Loes.
“Daudaun ne’e BTL halo ona melloramentu ba sistema bee-moos hamutuk 32 iha kapitál postu administrativu, sia mak agora iha prosesu kalkulasaun orsamentu no restu iha hela serbisu planu”, nia adianta.
Lembra katak, iha loron 19 Setembru 2025, Diretór Eskola Bázika Sentrál (EBC) 3.º Siklu Lualara, Aleixo Soares, informa katak tinan 10 ona sira-nia eskola la asesu ba bee-moos.
“Iha ne’e ami-nia difikuldade boot mak bee-moos. Loroloron bee ne’ebé ami konsumu, liuliu ba merenda eskolár ne’e ami simu husi komunidade ne’ebé hela besik eskola. Ba hariis-fatin nian tempu udan ami halibur udan-been no tempu bailoro uza de’it”, Aleixo Soares hateten.
Nia akresenta katak, antes ne’e iha tinan 2015 ba kotuk, sira asesu bee-moos, ne’ebé dada husi Bee Timor-Leste, maibé ikus mai bee-matan ne’ebé dada ba eskola ne’e maran to’o agora. Bee-matan ne’e rasik iha Kotolau.
“Difikuldade sira ne’e ami hato’o beibeik ona ba parte relevante, maibé to’o agora seidauk iha solusaun. Espera ba oin Governu bele ajuda ami, nune’e bele asesu fali bee-moos”, dehan.
Notísia relevante: Tinan 10 ona EBC Laulara la asesu bee-moos
Jornalista: Arminda Fonseca
Editora: Maria Auxiliadora
