DILI, 22 Outobru 2025 (TATOLI)—Governu liuhusi reuniaun Konsellu Ministru, kuarta ne’e, aprova proposta kona-ba kria liña solidária atu atende kazu violénsia bazeia ba jéneru no violénsia hasoru labarik no foinsa’e sira.
Vise-Ministra Solidariedade Sosiál no Inkluzaun (MSSI), Céu Brites, hateten ohin sira halo aprezentasaun kona-ba estabelesimentu liña solidária ne’ebé define ho ninia númeru kontaktu 116.
“Liña solidária ne’e ho objetivu atu halo atendimentu ba vítima violénsia doméstika hanesan feto no labarik feto sira, entaun bainhira sira hasoru violénsia doméstika sira bele kontaktu direta ba númeru ida-ne’e hodi hetan tulun,” Vise-Ministra ne’e informa ba jornalista sira iha Palásiu Governu, ohin.
Signifika, nia dehan, bainhira vítima sira kontaktu normalmente pedidu ne’e ba kedas iha ofisiál protesaun labarik no jéneru nian ne’ebé hola parte ba Ministériu Solidariedade Sosiál no Inkluzaun (MSSI).
Normalmente, tuir nia, liña solidária mak servisu gratuitu no konfidensiál ne’ebé disponivel oras 24 nia laran, neʼebé dezeña atu fornese kanál resposta imediata ba situasaun violénsia, hodi garante vítima sira asesu ba apoiu psikolójiku, sosiál, legál no institusionál.
Nune’e ho mekanizmu foun sei jere husi Ministériu Solidariedade Sosiál no Inkluzaun no sei servisu hamutuk ho ministériu, autoridade munisípiu sira no parseiru dezenvolvimentu balun, ho objetivu atu hametin protesaun ba vítima no koordenasaun entre servisu emerjénsia, seguransa, saúde no justisa.
Jornalista : Alexandra da Costa
Editór : Cancio Ximenes
