KM aprova proposta rejime exepsionál promosaun funsionáriu integra iha karreira dosente
DILI, 22 Outubru 2025 (TATOLI)—Konsellu Ministru, kuarta ne’e, aprova projetu Dekretu-Lei kona-ba rejime exepsionál ba promosaun bazeia ba antiguidade husi funsionáriu sira-ne’ebé integra iha karreira dosente.
Ministra Edukasaun, Dulce de Jesus Soares, hateten ohin iha Konsellu Ministru ekipa husi ME aprezenta rejime esesaun ba promosaun kada antiguidade ba profesór ne’ebé integra iha karreira dosente hodi haknaar-an iha Ministéria Edukasaun.
“Rejime ida-ne’e konsagra promosaun ekilibradu no uza maneira avaliasaun ne’ebé moos, transparênsia ho kritériu sira hanesan sira-nia tempu servisu. Avaliasaun dezempeñu sei indika ba sira-nia komportamentu, depois sistema de avaliasaun ne’e rasik konderadu iha sistema ida-ne’ebé mak ho klasifikasaun mínima hetan pontu 100, nune’e sira bele hakat ba grau tuir mai,” Ministra Dulce esplika ba jornalista sira iha Palásiu Governu, ohin.
Rejime ne’e, nia dehan, bolu rejime esesionál tanba ME sei aplika ba sira-ne’ebé mak 2026 atu tama ba reforma, kuazé 1.000-resin mak tama ba reforma maibé funsionáriu sira-ne’e hotu ho idade 65.
Enkuantu, karreira dosente nian ne’ebé regula husi Dekretu-Lei núneru 23/2010, 09 Dezembru, hetan revizaun iha tinan 2023 husi Dekretu-Lei númeru 31/2023, 31 Maiu, ne’ebé simplifika sistema husi prova avaliasaun ba efeitu asesu no promosaun, liuhusi kriasaun ba prova avaliasaun kompeténsia obrigatória hanesan mekanizmu prinsipál progresaun nian.
Tanba iha kontestu atuál, profesór 1.000-resin, maske sira-nia dedikasaun no kontribuisaun ba dezenvolvimentu sistema edukasaun nasionál, sira iha hela eskalaun ikus husi sira ida-idak nia grau no besik atu to’o idade reforma nian.
Medida ida-ne’e tuir Dekretu-Lei númeru 9/2025, 30 Abríl, ne’ebé estabelese limite idade ba terminasaun servisu iha Administrasaun Públika iha idade 65, hodi garante katak profesór sira-ne’ebé besik reforma, sira-nia kontribuisaun ba edukasaun nasionál hetan rekoñesementu.
Diploma ne’e mós estabelese katak promosaun exepsionál sei prodús efeitu hahú iha loron 01 fulan-Novembru tinan 2025, ba profesór sira-ne’ebé inklui iha faze dahuluk no iha loron 01 fulan-Janeiru tinan 2027, ba sira-ne’ebé inklui iha faze daruak.
Jornalista : Alexandra da Costa
Editór : Cancio Ximenes
