DILI, 22 Outubru 2025 (TATOLI)—Konsellu Ministru, kuarta ne’e, aprova projetu rezolusaun Governu kona-ba konsagrasaun loron 05 fulan-Juñu nu’udar loron nasionál tasi.
Proposta ne’e aprezenta husi Primeiru-Ministru, Kay Rala Xanana Gusmão, iha reuniaun Konsellu Ministru iha Palásiu Governu.
Bazeia ba dokumentu ofisiál ne’ebé públika iha portál Governu katak proposta ne’e hetan aprovasaun, neʼebé dedika hodi selebra no prezerva tasi no biodiversidade tasi iha Timor-Leste, nomós hala’o atividade sira ho objetivu atu promove nia valór no promove partisipasaun ativa sosiedade nian liuliu labarik no foinsa’e sira, iha ninia protesaun.
Konsagrasaun ba data ida-ne’e reflete rekoñesementu ba importánsia tasi ba ekilíbriu ambientál, sustentu ba komunidade no dezenvolvimentu sustentável nasaun nian, nune’e mós kompromisu Governu hodi konserva rekursu tasi no implementa polítika no planu asaun ba promosaun ekonómia marítima ida-ne’ebé reziliente no sustentável 2025-2035.
Rezolusaun Governu ne’e estabelese mós katak selebrasaun Loron Nasionál Tasi sei hala’o tinan-tinan, ho rejime rotasaun, entre kada munisípiu no rejiaun iha país ne’e, ho envolvimentu husi komunidade, autoridade rejionál no munisipál sira, lideransa komunitária, organizasaun sosiedade sivíl sira, setór privadu no sidadaun tomak, hodi reforsa valór kulturál no espirituál tasi nian ba povu timoroan no kompromisu nasionál ba prezervasaun tasi.
Jornalista : Alexandra da Costa
Editór : Cancio Ximenes
