DILI, 22 Outubru (TATOLI)—Ministériu Edukasaun (ME) aprezenta proposta Orsamentu Jerál Estadu (OJE) 2026 ho montante $117.550.930 bá Komisaun G iha Parlamentu Nasionál (PN) ba Asuntu Edukasaun, Juventude, Desportu no Kultura.
“Ita hatene katak Ministériu Edukasaun simu $117.550.930, hodi aloka ba Saláriu no Vensimentu $93.624.245, Bens no Servisu $10.021.005, Transferénsia Públika $4.852.080, Kapitál Menór $2.000.000, Kapitál Dezenvolvimentu $7.053.600,” Dulce de Jesus Soares dehan ba jornalista sira iha resintu PN, Kuarta ne’e.
Governante ne’e esplika, husi OJE 2026, ME sei prioriza ba programa prioridade lima kompostu husi infraestrutura eskolár, kurríkulu nasionál, teknolojia informátika, formasaun profesór no jestaun eskolár no iha sub progrma sira hanesan reforsa institusionál pre-eskolár, ensinu báziku, ensinu sekundáriu no ensinu rekorrente.
ME ezekuta ona orsamentu 79%
Entretantu, Ministériu Edukasaun to’o loron 20 Outubru ne’e, ezekuta ona $88.031.099,91 (79%), hosi orsamentu Jerál Estadu (OJE) 2025 husi totál alokasaun $113.384.784.
“Ita iha ezekusaun ba programa estratéjiku sira hanesan kurríkulu nasionál, infraestrutura, jestaun eskolár no ós programa sira seluk tan,” Dulce tenik.
Nia haktuir, ezekusaun husi montante orsamentu referidu ne’e foka ba Saláriu no Vensimentu, Bens no Servisu, Kapitál Menór, Transferénsia Públika no Kapitál Dezenvolvimentu.
Jornalista: Osória Marques
Editór: Xisto Freitas da Piedade
