DILI, 22 Outubru 2025 (TATOLI)—Ministra Solidariedade Sosiál no Inkluzaun, Verónica das Dores, informa ohin Ministériu Solidariedade Sosiál no Inkluzaun (MSSI) lansa atividade rekollamentu dadus ba ema ho problema bem-estar sosiál iha territóriu.
Ministra dehan tipolojia ema ho problema bem-estar sosiál mak hanesan labarik risku no perigu (abandonadu, esplorasaun, violénsia fízika no sexuál), depoiz adosaun labarik, labarik ne’ebé ho podér paternál, labarik nakar, labarik konflitu ho lei, ema tane liman hodi husu izmola, ema ne’ebé moris lemo-lemo no konsumidór droga.
Aleinde ne’e mós kona-ba vítima violénsia bazeia ba jéneru no violénsia doméstika hanesan ema ho defisiénsia, ema ho defisiénsia tanba moras krónika, eis prizioneiru ne’ebé vulneravel, ferik katuas abandonadu, feto risku sosiál ekonómika, família ki’ak, família ho uma laiha kondisaun atu hela, vítima dezastre naturál no dezastre insidénsia sosiál, labarik ne’ebé buka moris iha dalan (labarik ne’ebé hala’o nia moris tempu tomak iha dalan. Labarik iha dalan tanba presta nia tempu livre iha dalan), lésbika, gay, bisexuál, transexuál, transjéneru no intersexuál no labarik órfaun.
“Ohin loron, MSSI marka tan pasu importante ida iha prosesu rekollamentu dadus hodi identifika tipu problema bem-estar sosiál iha Timor-Leste,” Verónica dehan ba jornalista sira iha edifísiu MSSI, Kaikoli, Dili, Kuarta ne’e.
Rekollamentu sei hahú iha 22 Outubru no sei ramata iha 19 Dezembru 2025 ba munisípiu no postu administrativu sira-ne’ebé ho suku menus hosi lima (5). Maibé, ba munisípiu no postu administrativu sira-ne’ebé iha suku lima-sanulu, sei rekolla dadus durante fulan-ida semana-ida. Enkuantu ba munisípiu no postu administrativu ne’ebé iha suku ualu ba leten sei rekolla dadus durante fulan-ida semana-rua.
“Nune’e ohin ekipa responsavel MSSI nian hamutuk 153 simu tablet hodi dezloka ba munisípiu hodi rekolla dadus,” nia tenik.
Jornalista: Osória Marques
Editór: Xisto Freitas da Piedade
