PM Xanana kongratula Primeira-Ministra Japaun Sanae Takaichi
DILI, 23 Outubru 2025 (TATOLI) – Primeiru-Ministru, Kay Rala Xanana Gusmão, hodi Governu no povu Timor-Leste nia naran kongratula Primeira-Ministra Japaun liuhusi hakerek karta ofisiál ba Sanae Takaicchi ne’ebé nomeada sai Primeira-Ministra Japaun.
“Ha’u informa ba Prezidente Repúblika katak, ha’u hakerek ona karta hodi kongratula Primeira-Ministra Japaun nian,” Primeiru-Ministru, Kay Rala Xanana Gusmão, hateten ba jornalista hafoin hasoru malu ho Prezidente Repúblika, José Ramos-Horta, iha Palásiu Prezidensiál Nicolau Lobato, Bairru Pite, ohin.
Karta ofisiál ne’e ho númeru 128/PM-GPM/X/2025, Dili, 22 Outubru, Kay Rala Xanana Gusmão lori Governu no povu Repúblika Demokrátika Timor-Leste (RDTL) nia naran, hato’o parabéns bá nomeasaun nu’udár Primeira-Ministra Japaun nian.
Xanana Gusmão konsidera lideransa Sanae Takaichi nu’udár Primeira-Ministra feto da-huluk Japaun nian, reprezenta marku istóriku ida no refleta forsa kontinuasaun husi demokrasia no konfiansa povu Japaun nian ne‘ebé iha vizaun no servisu di‘ak.
Japaun iha konsiderasaun aas liu nu’udár parseiru dezenvolvimentu ida Timor-Lesta nian ne’ebé signifikativu-liu.
Japaun kontribui maka’as tebes bá Timor-Leste nia esforsu sira harii dame no Estadu dezde independénsia, no ninia amizade apoia ona Timor-Leste nia emerjénsia nu’udár demokrasia pasífika ho sosiedade nakloke, ekonomia ne’ebé buras no respeitu kle’an ba lei internasionál.
“Ami hein atu servisu besik ho ita-boot nia Governu atu hakle’ean liutan ami-nia kooperasaun no avansa ami-nia kompromisu ba pás, prosperiedade no dezenvolvimentu sustentável,” refere iha karta ofisiál ne’e.
Sanae Takaichi nu’udár Prezidente Partidu Demokrátiku Liberál (LDP) dezde 2025 no nomeada nu’udár Primeira-Ministra Japaun nian iha tersa (21 Outubru 2025) ne‘ebé sei simu pose iha tersa kalan.
Jornalista : Hortencio Sanchez
Editór : Cancio Ximenes
