DILI, 23 Outubru 2025 (TATOLI)–Autoridade Munisipál Dili (AMD) to’o trimestrál datoluk ezekuta ona Orsamentu Jerál Estadu (OJE) 2025 ho totál pursentu 73.3.
Prezidente Autoridade Munisipál (PAM) Dili, Francisco dos Santos esplika atinjimentu ba tasa ezekusaun OJE referidu akumula husi rúbika Saláriu no Vensimentu, Kapitál Dezenvolvimentu, Kapitál Menór, Transferénsia Públika no Bens no Serbisu ne’ebé ho totál orsamentu ba tinan 2025 hamutuk $19.234.005,00.
“Agora seidauk ezekuta másima mak Kapitál Dezenvolvimentu tanba tinan-ne’e implementa tarde maibé ita espera to’o fulan-Dezembru projetu sira-ne’e bele ramata,” Prezidente Autoridade Munisipál Dili dehan iha ninia kna’ar fatin, Matadouru, Dili, Kinta ne’e.
Francisco relata orsamentu Kapitál Dezenvolvimentu aloka ba projetu Programa Dezenvolvimentu Integradu Munisipál (PDIM) hamutuk lima kompostu konstrusaun sentru saúde iha Mante-lao no Dare, konstrusaun morru protesaun Eskola Bázika Filiál iha Mui Kuluhun.
Seluk, konstrusaun armazein ai-moruk ba sentru saúde iha Gricenfor no morru protensaun iha eskola Sekundária Jerál 10 Dezembru iha Komoro ho totál orsamentu hamutuk rihun 800 resin.
Entretantu, tuir dadus husi Portál Transparénsia Ministériu Finansa, loron Kinta (23/10/2025) ne’ebé TATOLI asesu, totál ezekusaun orsamentu AMD ba trimestrál datoluk atinje pursentu 73.3 kompostu husi ezekusaun ba kompromisu $1.893.300.17, Obrigasaun $12.198.339,44, atuál $8.922.225,20 no saldu hamutuk $4.625.669,22.
Jornalista: Natalino Belo
Editór: Xisto Freitas da Piedade
