DILI, 24 Outubru 2025 (TATOLI)—Asosiasaun Jornalista tolu akompaña Jornalista ida husi mídia nasionál, SAP News, Kinta ne’e, hato’o keixa ba Ministeriu Publiku (MP), tanba iha estudante universitáriu balun husi Universiade Dili (UNDIL) ne’ebe halo agresaun fízika hasoru jnia iha resintu, iha resintu universidade privada ne’e, Tersa (21/10).
Prezidente Uniaun Jornalista Timor-Leste (UPJTL) Horacio Babo hateten, asosiasaun jornalista UPJTL, Asosiasaun Jornalista Timor-Leste (AJTL) no Timor-Leste Press Union (TLPU) mai hatama keixa ba Ministériu Públiku (MP) relasiona ho agresaun fízika hasoru jornalista.
“Ohin Asosiasaun Jornalista tolu AJTL, TLPU no UPJTL akompaña kolega Jornalista ida-ne’ebé iha Tersa liubá halo kobertura iha Universidade Dili, hetan baku husi oknum estudante balun ne’ebé ami akompaña mai iha Ministériu Públiku atu hato’o keixa atu prosesa tuir dalan legál,” Prezidente UPJTL hateten ba Jornalista sira hafoin hatama keixa ba MP iha Matadoru, Kinta ne’e.
Notísia relevante : Jornalista na’in-10 halo kobertura ba serimónia TL adere ba ASEAN iha Malázia
Nia esplika, dala barak Jornalista sira halo kobertura ba atividade tuir lei komunikasaun sosiál, hatudu katak Jornalista tenke livre asesu bá ne’ebé deit no iha loron hirak liubá Jornalista balun bainhira bá hala’o kobertura iha universidade ne’e, sira mak konvida tiha bá no ikus mai estudante sira ne’e mak baku fali Jornalista ida.
“Tanba ne’e, ami hato keixa atu prosesu bele la’o bá oin. Keixa ne’ebé hato’o primeiru ba oknum sira ne’ebé halo violénsia ba Jornalista ne’e no hatama keixa ne’e lori mós ho evidénsia hanesan vídeo,” nia akresenta.
Iha sorin seluk, Reitór Universidade Dili hato’o ona mensajen, katak kona-ba krime nia dalan tenke liuhusi prosesu justisa.
“Ida-ne’e la’ós ba Jornalista de’it, maibé ba sé de’it mak hetan krime, tenke liuhusi prosesu justisa atu Tribunál mak bele deside sé mak loos no sé mak sala,” nia katak.
Horacio hatutan, tenke konsidera Jornalista mós ema, la’ós konvida bá halo kobertura to’o ikus tula fali liman.
“Ita tenke kontribui ba dame no estabilidade, labele iha dalan ba violénsia, sé violénsia ba Jornalista mak nia fatin tenke liuhusi keixa no prosesa ba oin. Prosesu ida-ne’e tenke avansa ba oin, tanba Jornalista la’ós kriminozu, laiha dalan atu baku Jornalista,” nia afirma.
Biban ne’e, Prezidente Asosiasaun Jornalista apela ba universidade sira atu respeita serbisu Jornalista nian, tanba Jornalista maka liman ain ba informasaun no fontes ba informasaun.
“Jornalista ne’e fasilita informasaun ba públiku, estudante povu no lider hotu, Jornalista rekolla informasaun atu públika, fasilita informasaun. Tanba ne’e husu atu respeita no valoriza Jornalista nia serbisu, la’ós buat ki’ik ida baku Jornalista, ne’e labele, tenke respeita vokasaun Jornalista, se baku laiha toleránsia,” nia reforsa.
Jornalista : Natalino Costa
Editora : Julia Chatarina
