VIKEKE, 23 Outubru 2025 (TATOLI)–Koordenadór Selebrasaun Timor-Leste nia Adezaun ba Association of Southeast Asian Nations (ASEAN) iha Munisípiu Vikeke, Francisco S. Varela, informa Autoridade Munisípiu Vikeke distribui ona karta konvite ba populasaun no autoridade lokál sira hamutuk 1000 atu festeja Timor-Leste nia adezaun ba ASEAN.
“Relasiona ho serimónia deklarasaun Timor-Leste nia adezaun ba ASEAN ne’ebé realiza iha Domingu (26/10), ami distribui ona karta konvite ba autoridade lokál, sosiedade sivíl, partidu polítiku no populasaun purvolta hamutuk 1000 hodi festeja Timor-Leste sai membru plenu ASEAN,” Francisco S. Varela ba TATOLI iha nia kna’ar fatin, Vikeke, Kinta ne’e.
Notísia relevante: Povu Vikeke nia lian ba adezaun Timor-Leste ba ASEAN
Nune’e, nia dehan, komisaun distribui ona kamizola ASEAN bá kada suku no postu administrativu sira hodi hatais iha loron 26 fulan-Outubru 2025, iha ámbitu Timor-Leste nia adezsaun ba ASEAN.
“Ami prepara mak hanesan distribui kamizola ASEAN nian hamutuk 2.826. Enkuantu, preparasaun seluk hanesan tenda, eletrisidade, konsumsaun, kadeira no seluk tan,” nia hato’o.
Francisco hatutan, sira konvida mós banda múzika sira husi nasionál hodi halo konsertu iha Domingu lokraik, atu festeja loron importante ne’e.
“Iha biban ne’e hakarak husu populasaun Vikeke mantein ita-nia unidade no pás hodi simu Timor-Leste nia adezaun ba ASEAN,” nia fó-hanoin.
Entretantu, serimónia Timor-Leste nia adezaun ba membru plenu ASEAN ne’e, Governu aloka orsamentu ho montante $7000 ba Munisípiu Vikeke hodi festeja. Eventu festeja adezaun Timor-Leste ba ASEAN realiza iha resintu Autoridade Munisipál Vikeke.
Jornalista: Vitorino Lopes da Costa
Editór: Xisto Freitas da Piedade
