DILI, 23 Outubru 2025 (TATOLI)—Ministériu Agrikultura, Pekuária, Peska no Floresta (MAPPF) no PT. Minarta Dutahutama, husi Indonézia, asina kontratu ba projetu konstrusaun eskema irrigasaun Maukola ne’ebé lokaliza iha mota Lomea entre suku Beko, postu administrativu Suai Vila, no suku Tahasilin, postu administrativu Zumalai, munisípiu Kovalima.
Projetu ne’e ho valór orsamentu hamutuk millaun $15,2 no nia durasaun kontratu ba tinan rua ho balu ka (fulan 30).
Ministru Agrikultura, Pekuária, Peska no Floresta, Marcos da Cruz, esplika katak kontratór sei konstrui barrajen, muru protesaun no sediment trap.
“Irrigasaun ne’e di’ak, sei fornese bee ba natar ektare hamutuk 3.597 iha fatin rua mak natar Maukola no Kuluoan. Totál benefisiáriu ka natar-na’in 1.035”, governante ne’e informa.
Ministru relata katak eskema irrigasaun Maukola konstrui dezde iha tempu Indonézia ho eskema teknikál, maibé besik ukun-an irrigasaun referida aat filafali tanba nia barrajen (weir) ne’e kotu tiha, entaun la funsiona ba área ne’e hotu.
Tuir nia, iha tinan 2015, Governu halo esforsu halo estudu ba irrigasaun ne’e atu hadi’a, maibé tanba kestaun orsamentu entaun tinan ne’e foin mak prevee.
“Maibé husi ministériu halo esforsu kuaze [natar] ektare 800 mak funsiona iha tinan ne’e. Serbisu ne’ebé ita halo liuhusi destakamentu mákina pezada iha ne’ebá, normaliza kanál ne’e iha parte rua Maukola no Kuluoan, maibé ho konstrusaun agora sei bele kobre hotu kedas. Ita espera kompañia serbisu no bele atinje nia kualidade no termina tuir kontratu ne’ebé iha”, dehan.
Marcos da Cruz akresenta katak hafoin asina kontratu, sei hatama ba Tribunál Konta no bainhira laiha problema mak sei asina tan kontratu ho konsultór, Dongsung Enegineering Co. Ltd, husi Koreia, ho montante orsamentu hamutuk $888.610, atu halo supervizaun ba konstrusaun obra ne’e. Totál verba ba konsultór ho kontratór hamutuk $16.047.180,94.
Iha fatin hanesan, Diretór PT. Minarta Dutahutama, Usman Lameko, agradese ba Governu tanba bele fó fiar hodi konstrui irrigasaun ne’e no kompromete katak serbisu hotu sei la’o tuir kontratu ne’ebé iha.
“Ami agradese tebes ba konfiansa ne’ebé fó ba ami. Ohin asina ona akordu, ba oin ami hahú ona mobiliza ekipamentu no materiál sira ba konstrusaun nian, no ami espera ezekuta ho di’ak no termina tuir kontratu ne’ebé iha”, dehan.
Maski PT. Minarta Dutahutama mak sai manán-na’in ba projetu ne’e, maibé ba oin husu nafatin Governu nia apoiu durante iha ezekusaun serbisu hamutuk, nune’e buat hotu bele akontese tuir kontratu.
Jornalista : Arminda Fonseca
Editora : Maria Auxiliadora
