KOVALIMA, 23 Outubru 2025 ( TATOLI)-Diretór Servisu Munisípiu Agrikultura Kovalima, Lino Magno hateten, servisu autoridade sira iha Kovalima persiza konstrui fatin oho animál no faan naan nune’e fasilita servisu pekuária atu halo kontrola naan ne’ebe negosiante sira faan ne’e, konsumidór sira bele konsumu ka lae?.
“Ita laiha fatin atu ko’a naan nune’e parte pekuária no Servisu Munisipál Jestaun Merkadu no Turízmu presiza atu halo koordenasaun ba malu atu oinsá maka bele konstrui fatin ko’a naan ba negosiánte sira bele faan naan,” nia hateten ba jornalista sira iha salaun AMC.
Durante ne’e, servisu pekuária susar atu halo kontrolu ba naan sira ne’ebé maka negosiantes sira faan iha merkadu tanba sira oho animal iha tempu kalan no laiha fatin permanente.
Alende ne’e, negosiante sira mós laiha fatin atu faan sira-nia animal haki’ak nune’e sira faan arbiru iha área merkadu nian.
Iha sorin seluk, Xefe Servisu Lokál Postu Tilomar, Umberto da Silva rekoiñese merkadu sentrál iha Kovalima no merkadu iha postu administrativu Tilomar laiha fatin ko’a no faan naan.
“Iha Kovalima ita laiha duni fatin atu ko’a naan maibé iha tempu okupasaun Indonézia, ita iha fatin atu ko’a naan ne’ebé lokaliza iha suku Kasabauk, postu administrativu Tilomar , iha aldeia Tabolo iha rai ne’ebé ho nia estatutu rai Estadu ni’an, oinsá maka bele utiliza tanba daudaun ne’e abandona,” nia hateten.
Jornalista:Celestina Teles
Editór:Florencio Miranda Ximenes
