DILI, 24 Outubru 2025 (TATOLI)-Timor-Leste (TL) sei sai membru plenu Asosiasaun Nasaun Sudeste Azíatiku (ASEAN) iha loron 26 Outubru 2025, durante Simeira ASEAN ba da-47, iha Kuala Lumpur, Malázia.
Tanba ne’e, Uma-Kreda Katólika Timor-Leste konsidera adezaun país nian sai membru plenu ASEAN ida-ne’e ksolok ida ba povu no nasaun, tanba momentu ida-ne’e hanesan marka istória foun ida ba povu ne’ebé durante ne’e hein no marka mós istória ida ba Timor-Leste iha internasionál nia matan.
Ida-ne’e tenke agradese ba parte hotu ne’ebé halo serbisu maka’as, liuliu Governu tanba konkretiza mehi ida-ne’e dezde 2011.
“Agora, ita tama ba ASEAN atu mantein ita-nia kultura mak ha’u hanoin ita tama ba ASEAN ida-ne’e responsabilidade ida ba ita hotu timoroan idaidak nomós ba Governu oinsá mak ita kontinua tama ASEAN ne’e hatuur nafatin ita-nia an nu’udar povu ida-ne’ebé iha ninia identidade, kultura no iha ninia fiar rasik”, Arsebispu Arkidioseze Metropilitana Dili, Don Virgílio Kardeál do Carmo da Silva, dehan ba Tatoli iha Aeroportu Komoro, ohin.
Nia hateten bainhira tama ba ASEAN tenke hariku liután ASEAN nia espíritu no hothotu serbisu maka’as, nune’e la’ós tama de’it maibé oinsá tama ne’e ho diversifikasaun oioin, halo ASEAN ne’e sai furak liután, tanba Timor-Leste prezensa iha laran.
“Lori nafatin ita-nia identidade kultura ida-ne’e mak sei hariku ita-nia prezensa iha ASEAN. Ha’u hanoin buat barak ita halo ona, no odamatan loke ona mai ita, maibé agora atu ba oin ne’e, ita tenke serbisu maka’as iha área hothotu, liuliu edukasaun tanba sai xave ida lori Timór ne’e hatuur nia an iha ASEAN ne’e”, nia realsa.
Don Virgílio salienta buat hotu atu la’o edukasaun mak sai xave. “Ita bele mellora área hothotu, maibé edukasaun mak sai xave ba parte hothotu, nune’e ita sente sai na’in ba ASEAN ne’e”, konklui.
Notísia relevante: Vox Pop: Setór privadu defende kooperasaun no investimentu atu fortalese pozisaun TL iha ASEAN
Jornalista: Arminda Fonseca
Editora: Maria Auxiliadora
