Empreza Timor Enterprise aprezenta planu investimetu hodi haki’ak karau iha Kovalima
KOVALIMA, 24 Outubru 2025 ( TATOLI)– Empreza Timor Enterprise liuhusi reuniaun konsellu koordenasaun munisipál ho autoridade sira iha munisípiu Kovalima, aprezenta planu investimentu atu haki’ak karau iha aldeia Halik, Suku Beco, Postu Administrativu Suai.
Reuniaun Konsellu Koordenasaun ne’e , lidera husi Sekretáriu Munisípiu Asuntu Finansa, Alberto Moniz de Araujo hodi rona aprezentasaun husi empreza kona-ba planu investimentu referidu.
“Iha ajenda ba dahuluk ne’e, empreza Timor Enterprise halo aprezentasaun kona-ba sira-nia planu atu halo investimentu haki’ak karau no produsaun naan karau, iha aldeia Halik, Suku Beco, Postu Suai, Munisípiu Kovalima”, Sekretáriu Munisípiu ne’e hato’o ba TATOLI,I.P iha salaun AMC.
Hafoin empreza aprezenta planu ne’e, nia dehan prontu servisu hamutuk ho empreza tanba planu ne’e hakarak hakbi’it setór privadu sira.
“Empreza timor-oan hakarak halo investimentu iha área pekuária foka ba hanesan haki’ak karau no halo produsaun naan kara. Investimentu ho intensaun atu fornese na’an ba komunidade no forma grupu hodi atrai komunidade atu haki’ak animal”, nia afirma.
Iha biban hanesan hanesan, Diretór Empreza Timor Enterprise, Alberto de Oliveira, reforsa hanesan na’in ba empreza halo aprezentasaun kona-bá planu investimentu iha área pekuária ba autoridade-sira iha Kovalima.
“Aprezentasaun planu investimentu iha área pekuária ne’e iha nia benefisiu no kria kampu traballu, tanba dadaun ne’e empreza hahú halo hela preparasaun infraestrutura”, nia afirma. nia dehan.
Planu investimentu ne’e ho intensaun atu fornese na’an karau ne’ebé ho nutrisaun bele fornese ba programa merenda eskolár, merkadu lokál no redús importasaun na’an husi rai liur.
Iha prosesu preparasaun infraestrututura, empreza daudaun-ne’e fó ona servisu ba ema na’in-20 no tuir planu semana-rua tan empreza sei aumenta ema na’in- 10 atu servisu iha área fila rai, aterru dalan no seluk tan.
Entretantu, Administradór Postu Administrativu Tilomar, Venancio Sarmento, apresia ba emprezariu Timoroan ne’e tanba iha inisitiva atu halo investimentu iha área pekuária.
“Ita hatene investimentu ne’e bele fó benefisiu mós ba joven-sira, nune’e labele impede investór sira halo investimentu, ita hanesanKovalima-oan fó apoiu ba empreza referidu, nune’e investimentu ne’e bele la’o ho susesu ”nia apresia.
Jornalista:Celestina Teles
Editór:Florencio Miranda Ximenes
