DILI, 24 Outubru 2025 (TATOLI)–Ekipa S’amuser Football Club (FC) manán UNITAL FC ho skor mihis 0-1 bainhira hala’o jogu jornada daruak primeira divizaun Liga Futeból Femininu Timor-Leste (LFFTL) iha Estádiu Munisipál Dili, Sesta loraik ne’e.
Ekipa rua halao jogu iha estádiu Munisipál Dili ho ritmu ne’ebé diferente tanba UNITAL FC ne’ebé konsideradu ekipa underdogs maibé fó surpreza ba S’amuser FC ne’ebé nakonu ho jogadór estrela ne’ebé enxe husi selesaun nasionál.
Iha primeira parte husi jogu referidu, hala’o ho inisiativa atake husi S’amuser FC iha-ne’ebé kuaze domina kampu maibé labele prodús golu tanba UNITAL FC tun ho formatu defensivu.
Enkuantu, iha jogu segunda parte, S’amuser FC la redús atake ba área grandeia UNITAL, maibé maioria jogadór UNITAL utiliza maneira parkir bus nune’e difikulta ekipa S’amuser atu prodús golu.
Maski nune’e, golu husi S’amuser FC akontese iha minutu estra 90+2, bainhira árbitu hatudu pontu mutin sinál penalidade bainhira jogadór Akasa (5) husi UNITAL halo erru iha área bandu nian.
Ho nune’e, jogadór S’amuser atuál kapitaun ekipa nasionál Timor-Leste, Dolores Viana ne’ebé hetan konfiansa xuta penalidade lori tabela skor 0-1 no hakotu jogu entre ekipa rua.
Entretantu, ho rezultadu jogu ne’e, provizoriamente S’amuser FC lidera tabela klasifikasaun ho pontu 6 hafoin manán rua (2), enkuantu UNITAL FC kontinua mantein iha pozisaun dasiak hafoin derrota rua (2) husi jogu rua (2).
Jornalista: Natalino Belo
Editór: Xisto Freitas da Piedade
