DILI, 25 Outubru 2025 (TATOLI) – Asosiasaun Futeból Dili Leste (AFDL) organiza kongresu datoluk ho tema “Hametin Unidade Nu’udar Orgullu ba Asosiasaun Futeból Dili Leste (AFDL)” hodi garante dezenvolvimentu futeból ba futuru.
“Ami-nia esperansa mak Prezidente no Sekretáriu-Jerál [FFTL] jerasaun foun iha vontante di’ak atu lori Federasaun Futeból ba oin. Ami asosiasaun hakarak ka lakohi tenke apoiu totalmente, tanba programa di’ak bele lori bola ne’e ba oin”, Prezidente AFDL, Aleixo Cobra, hateten ba jornalista sira iha salaun Luz Clarita, Dili, sabádu ne’e.
Nune’e, iha kongresu ne’e hamutuk atu diskute buat ne’ebé di’ak hodi hametin unidade liuhusi asaun, liuliu hadi’a prestasaun jogadór sira, garante merkanizmu di’ak ba selesaun, diskute planu no atividade sira hodi implementa ba área referida.
Vise-Prezidente AFDL, José Leo Oliveira, reforsa mós katak atu hametin unidade ne’e importante liuhusi asaun ba deznvolve futebol óba futuru.
Kongresu ne’e atu diskute no aprova estatutu asosiasaun nian, planu atividade no orsamentu eventuál.
Iha sorumutu ne’e aprezenta mós kandidatu atu hili estrutura ezekutiva AFDL, maibé seidauk halo votasaun tanba asosiasaun nia membru klubu rua hanesan Klubu Santa Krús no Portu Korasaun no parte Federasaun Futebol Timor-Leste (FFTL) la marka prezensa, nune’e adia ba tempu seluk.
AFDL iha membru klubu efetivu hitu kompostu husi Vila Ataúru, Leste United, Dili Leste, Maranata, FC Portu, Korasaun, Santa Krúz.
AFDL durante ne’e hala’o atividade treinamentu rotina ba jogadór sira, garante saláriu treinadór norealiza kopa.
Tuir planu, iha tempu badak, realiza taxa rotativa no asosiasaun mós kompete ba sub-17 ba feto no mane tama iha finál. Enkuantu durante ne’e iha difikuldade ba kampu atu treinu.
Daudaun ne’e, AFDL hetan subsídiu husi FFTL ba kada fulan hamutuk $600 hodi aloka filafali ba klubu sira hodi apoiu atividade sira.
Jornalista: Nelson de Sousa
Editór: Cancio Ximenes
