João Soares sai manán-na’in ba Kompetisaun Planu Negósiu Inovativu 2025
DILI, 25 Outubru 2025 (TATOLI)—Foinsa’e inovadór kuda ai-funan freska husi Ainaro. João Soares, sai vensedór ba Kompetisaun Planu Negósiu Inovativu (KPNI) 2025 ba da-11 ho tema “Inovasaun Mak Dalan ba Susesu” ne’ebé organiza husi Institutu Apoiu Dezenvolvimentu Emprezariál (IADE).
Manán-na’in ne’e aprezenta nia planu negósiu iha área florekultura hodi halo distribuisaun ai-funan freska ba loja sira iha Dili.
“Ha’u kontente, tanba bele sai manán-na’in ne’ebé okupa primeiru lugar iha Kompetisaun Planu Negósiu Inovativu 2025 ho planu negósiu kuda ai-funan freska. Ha’u hetan trofu ho osan montante $6.000,” João Soares hateten ba jornalista sira iha Timor Plaza, Sabdu ne’e.
Nia lembra katak, uluk kuda ai-funan hodi só hodi infeita uma maibé durante COVID-19 iha 2020, hahú kuda ai-funan barak hodi ba faan tanba ema barak mak buka.
“Ita mós suplay kada semana ba merkadu sira iha Dili laran hodi bele hetan rendimentu ne’ebé mak di’ak. Kada semana, ami hetan rendimentu $500,” nia haktuir.
Iha fatin hanesan, Ministru Agrikultura, Pekuária, Peskas no Florestas, Marcos da Cruz, afirma katak joven sira-niaideia inovativu, kona-ba agrikultura, agronegósiu, peska, turizmu, prosesamentu aihan ka inovasaun digitál, hotu-hotu reflete sira-nia kbi’it hodi komprende oportunidade no dezafiu sira.
“Inovasaun ne’ebé aprezenta husi ita-nia joven sira iha kompetisaun ne’e, la’ós de’it kona-bá teknolojia avansadu ka rekursu bo’ot. Maibe, ida-ne’e kona-bá kreatividade, rezolusaun no abilidade atu transforma dezafiu ba oportunidade sira-ne’ebé bele kontribui ba kreximentu ekonomia familia no rendimentu nasaun nian. Ita-boot sira-nia planu negósiu hatudu ona katak juventude timoroan prontu atu foti pasu konkretu hodi estabelese empreza foun, kria servisu no kontribui ba objetivu dezenvolvimentu nasionál,” Marcos da Cruz haktuir.
Diretór Ezkutivu IADE, Filomeno Marcelino Belo, hateten katak abertura ba kompetisan referida iha fulan-Fevereiru liu ba, joven hamutuk 466 mak konkorre maibé 15 de’it mak hakat ba faze finál.
“Agradese ba komisaun organizadora ne’ebé esforsu-an maka’as hahú husi rejistrasaun iha fevereiru 2025 to’o nia konkluzaun. Ema hamutuk 466 mak konkorre maibé selesiona de’it 15. Signifika katak prosesu tais ne’e mak hodi lori tempu naruk,” nia hareren, ” nia relata.
Luís da Costa Fernandes, husi Manatutu, okupa segundu lugar, no aprezenta nia planu negósiu iha setór ortikultura. Nia simu prémiu ho valór $5.000.
Salustino Freitas Pinto, husi Dili, sain manán nain datoluk, no aprezenta nia planu negósiu iha setór , liliu iha kuda no faan tomate, no hetan osan ho montante $4.000.
Maria Olinda, husi Ainaru, okupa kuartu lugar, no apresenta nia planu negósiu iha culinária hodi tranforma produtu lokál ba dose, tanba nia hetan prémiu ho osan $2.000. Lino Dencio dos Reis, husi Vikeke, apresenta planu negósiu iha hakiak ikanmas no simu osan montante $1.750 no sestu lugar okupa husi Isac Martins, husi Liquisá, no apresenta planu negósiu iha produsaun jeladu (ice cream). Nia simu prémiu ho osan montante $1.250.
Jornalista : Felicidade Ximenes
Editór : Cancio Ximenes
