VIKEKE, 27 Outubru 2025 (TATOLI)—Asosiasaun Feto Potensiál (AFP) Munisípiu Vikeke servisu hamutuk ho Institutu Apoiu Dezenvolvimentu Emprezariál (IADE), Segunda ne’e, oferese formasaun ba grupu sanulu (10) kona-ba kontabilidade jere fundu.
Objetivu husi formasaun ne’e, Vise Prezidente AFP, Paulina Freitas esplika katak atu motiva grupu sira jere sira-nia atividade ho di’ak.
Nia haktuir formasaun ne’e inisia husi Asosiasaun Feto Munisípiu Vikeke ba membru grupu sanulu ne’ebé asesu ba fundu rotativu husi Sekretaria Estadu Igualdade (SEI).
“Liuhusi formasaun ida-ne’e bele motiva membru grupu sira. Ita-nia grupu sira-ne’e maihusi postu lima iha Vikeke,” Paulina Freitas ba TATOLI iha Postu Vikeke Vila, Segunda ne’e.
Paulina solisita membru grupu sira-ne’ebé partisipa iha formasaun ne’e aproveita ho di’ak atubele komprende kontabilidade ne’ebé parte IADE oferese.
Nia hato’o agradesimentu ba IADE Munisípiu Vikeke ne’ebé disponivel fasilita formasaun feto maluk sira.
Iha fatin hanesan, Diretór IADE Munisípiu Vikeke, Antonito do Rosário esplika IADE sempre oferese formasaun ba organizasaun sira liuliu ba área negósia nian.
“Durante ne’e ita haree ema fó apoiu fundu ba grupu sira barak, maibé mate mak barak tanba falla husi jestaun. Maibé, liuhusi AFP Vikeke ita bele servisu hamutuk hodi kapasita ita-nia grupu sira oinsá jere sira-nia fundu. Maski grupu sira-ne’e kada grupu hetan fundu $1000 husi SEI, maibé ita haree la’o di’ak, kompara ho ema sira-ne’ebé hetan fundu boot,” nia hato’o.
Nune’e, Antonito enkoraja grupu sira tenke jere fundu sira-ne’ebé Governu apoiu ho di’ak atubele fó benefísiu ba grupu ho nia membru sira.
“Tenke kria planu negosiu ida-ne’ebé di’ak hodi fó retornu ba ita-boot sira. Karik implementa mak hasoru difikuldade bele konsulta ami hodi ami fó dalan ba grupu sira liga ba negósiu nian,” nia fó-hanoin.
Formasaun ne’e partisipa husi husi grupu sira iha postu lima hanesan Uatukarbau, Vikeke Vila, Lakluta, Ossú no Uatulari. Kada grupu reprezanta ema na’in-rua. Formasaun hala’o durante loron ida.
Jornalista: Vitorino Lopes da Costa
Editór: Xisto Freitas da Piedade
