DILI, 27 Outubru 2025 (TATOLI)-Arsebispu Arkidióseze Metropolitana Dili, Don Virgílio Kardeál do Carmo da Silva, SDB, hateten joven sira persiza haburas fiar hanesan kultura no identidade iha ASEAN.
Don Virgílio hato’o asuntu ne’e bainhira fó sakramentu krisma ba joven 501 iha Parókia São José Ai-mutin Dili, domingu ne’e.
“Ita-nia kilat mak orasaun, tenke hatene tau konfiansa iha Maromak, kuida lilin ida ne’e hanesan kuida imi-nia fiar, ohin imi renova ona imi-nia krisma, entaun hakarak imi kontinua sai sarani di’ak iha ita-nia rai liliu bainhira Timor-Leste tama ASEAN, kontribuisaun boot mak fiar, kultura no identidade,” hateten Don Virgílio iha Parókia Ai-mutin.
Sakramentu krisma mak momentu boot ida ba joven sira atu fó valorizasaun kona-ba fiar no responsabilidade hanesan kristaun.
“Lilin ne’e hanesan imi-nia kompaneiru moris, sunu bainhira imi presiza, sunu bainhira imi iha problema, sunu bainhira imi iha nakukun laran, hein katak imi joven sira bele metin liután iha imi-nia fiar,” Nia esplika
Iha parte seluk, Administradór Parókia São José Aimutin, Padre Hélio Castro Alves, agradese ba Arsebispu Arkidióseze Metropolitana Dili tanba bele selebra sakramentu krisma ba krismandu 501.
“Sira ne’ebé simu sakramentu krisma mak pasa iha formasuan fulan neen to’o fulan hitu, ida ne’e tanba Maromak hakbi’it imi ho forsa, atu imi kontinua badinas iha formasaun,” hateten Pe. Hélio.
Nia hateten joven 600 resin maka antes ne’e rejistu atu hetan sakramentu krisma, maibe depois tuir formasaun durante fulan-neen resin, formandu 501 maka simu sakramentu krisma.
“Sakramentu krisma ne’e buat boot ida ba ita-nia espiritu, espera imi hotu iha maturidade ba fiar no halo buat di’ak iha imi-nia moris,”nia hatutan.
Jornalista: Cidalia Fátima
Editór : Florencio Miranda Ximenes
