DILI, 27 Outubru 2025 (TATOLI)-Governu fó toleránsia pontu husi 31 Outubru to’o 02 Novembru 2025, ba selebrasaun loron matebian sira-nian ne’ebé kada tinan selebra iha kada loron 02 Novembru.
Tanba, ema hotu konsidera katak loron refere hetan previzaun klaru hanesan loron feria nasionál tuir lei númeru 10/2005, 10 Agostu, iha alínea f) no g) nú. 1, artiku 2°Lei n.o 10/2005, ne’ebé alterada husi lei nú. 3/2016, loron 25 fulan-Maiu, no 10/2023, loron 5 fulan-Abríl, define katak atividade ida-ne’e sai hanesan fatin selebrasaun relijiozu sira-nian iha loron refere ne’ebé iha sentidu importánsia boot no signifikadu ba katóliku sira-ne’ebé abitualmente partisipa iha sira-nia destinasaun rasik.
Konsidera mós katak iha loron refere sei iha ema barak ho kuantidade númeru ne’ebé boot sei muda ba sira-nia knua hodi partisipa iha serimónia relijiozu ne’ebé sei halo iha loron refere sira.
Nune’e sei laiha prátika servisu husi funsionáriu no ajente administrasaun públika nian tanba hotu-hotu sei ba selebra loron relijiozu ida-ne’e ho ida-idak nia família.
Aleinde ne’e, loron feria nasionál ida-ne’e mós iha konsiderasaun tuir lei númeru 10/2005 loron 10 fulan-Agostu iha alínea d) nú. 6 artigu 7°, ne’ebé altera husi lei nú 3/2016, loron 25 fulan-maiu, no 10/2023, loron 5 fulan-Abríl, kona-ba kompeténsia ba Primeiru-Ministru atu fó toleránsia pontu ba “funsionáriu no ajente ministériu sira hanesan mós ba institutu no organizasaun sira-ne’ebé integradu ba administrasaun indireta Estadu nian”;
Iha biban ne’e mós tuir disposisaun iha lei númeru 10/2005, loron 10 fulan-Agostu alínea b) nú. 2 no alínea d) nú.6 iha artigu 7°, ne’ebé altera husi lei nú. 3/2016, loron 25 fulan-Maiu, no 10/2023, loron 5 fulan-Abríl, fó biban ba Primeiru-Ministru, liu husi Despaixu nú 22/PM/X/2025, loron 27 fulan-Outubru, ne’ebé iha determinasaun hanesan tuir mai:
- Fó toleránsia pontu iha loron 31 fulan-Outubru tinan 2025, durante loron tomak.
- Prezente despaixu ne’e prefere ba funsionáriu, ajente no traballadór sira hotu ne’ebé presta atividade sira iha servisu administrasaun direta Estadu nian, sentru ka deskonzentradu, ka iha organizasaun administrasaun indiréta nian.
- 3.Enkuantu husi númeru anterior, rekursu umanus servisu públiku sira ne’ebe, husi natureza atividade sira ne’ebé halo sira, tenki mantein-an iha funsionamentu iha períodu ne’e.
- 4.Labele impede kontinuidade no kualidade servisu públiku nian ne’ebé sei presta, dirigente máximu sira husi servisu refere sira iha númeru anterior tenki promove dispensasaun dever assiduidade nian ba rekursu umanus respetivu sira, iha loron ne’ebé sei fó hatene ona.
Jornalista : Alexandra da Costa
Editór : Cancio Ximenes
