DILI, 27 Outubru 2025 (TATOLI)—Diretór Jerál Servisu Nasionál Ambulánsia Emerjénsia no Médikamentu, Institutu Públiku (SNAEM, I.P), Simplicio Amaral, hateten iha tinan 2025 ne’e Governu prevee ona orasamentu hamutuk $10.500,00 hodi reabilita edifisiu SNAEM iha munisípiu Ainaru, Baukau no Reziaun Administrativu Oekusi Ambenu (RAEOA).
“Reabilitasaun ne’e tuir sira-nia modelu, se edifisiu ne’e boot uitoan, ezemplu RAEOA ita prevee orsamentu rihun $6, Ainaru mai iha parte Muabisse ita prevei rihun $3 ba iha Baukau rihun $1.500. Baucau kiik-liu entaun osan mós tuir de’it ne’e, orsamentu tinan 2025 nian,” Simplicio Amaral hateten ba jornalista sira iha edifisiu SNAEM Kaikoli, segunda ne’e.
Nia dehan, rezultadu ne’ebé fó sai bazeia ba relatóriu ne’ebé submete husi Munisípiu tolu (3) bainhira hala’o enkontru fulan tolu nian.
“Enkontru ida ohin ne’e, ita foku liu ba enkontru trimestrál, presentasaun servisu, entaun ita-haree ba relatóriu sira ne’e liuliu sistema aprovizionamentu ne’ebé mak iha munisípiu halo reabilitasaun, cutring subvensaun no progresu servisu nomósaun atendementu pasiente,” nia informa.
Nia dehan, reabilitasaun ba edifisiu hirak ne’e daudaun ne’e la’o hela no atinje pursentu ne’ebé avansadu.
“Ita halo re-abilitasaun ba ita-nia Servisu Nasionál Ambulansia Emerjénsia no Médikamentu sira, iha RAEOA, Ainaru, Maubisse nomós iha Baukau, ne’ebé Baukau nia haotu ona, Ainaru nia ita atinje ona 72% no RAEOA mak sei 40%,” nia dehan.
Nia hatutan, reabilitasaun ne’e sei kontinua ba munisípiu seluk maibé depende ba Orasamentu Jerál Estadu 2026 ne’ebé seidauk diskute iha Parlamentu Nasionál, maibé orsamentu ba reabilitasaun tama hotu iha planu.
Jornalista : Hortencio Sanchez
Editór : Cancio Ximenes
