DILI, 27 Outubru 2025 (TATOLI)—Kompetisaun primeira divizaun Liga Futeból Famininu Timor-Leste (LFFTL) jornada daruak VDL FC sofre golu 14-0 bainhira kontra Buibere FC, enkuantu Akadémika FC hurlele Kulugisa 0-6 iha Estádiu Munsipál Dili, Domingu (26/10/2025).
Buibere FC lidera 9-0 iha primeira parte iha-ne’ebé golu hirak-ne’e prodús husi jogadora sira hanesan Deonísia da Silva iha minutu 5, 13 no 23, Gracia da Costa iha minutu 12 no 33, Lucelia 16, 37 no 45+2 no Leliana da Silva iha minutu 43.
Iha segunda parte, Buibere FC aumenta tan golu lima ne’ebé prodús husi jogadora sira hanesan Celiana Silva iha minutu 53, Epifânia da Costa 58 no 67, Tacia Cancio 84 no jogadora Bakhita Gonçalves iha minutu 88.
Enkuantu, ekipa Akadémika FC ne’ebé derrota iha jornada dahuluk konsege rekolla pontu tolu (3) iha tabela klasifikasaun hafoin manán ekipa husi Munisípiu Baukau Kulugisa FC ho skor 0-6.
Golu neen (6) referidu, prodús husi jogadora sira hanesan Gradiana Avelina iha minutu 3 no 6, Juvencia Soares iha minutu 28, Hermenia da Costa 31 no 90+3 no Liliana dos Santos iha minutu 61.
Ho rezultadu jogu rua ne’e, rezulta Buibere FC okupa iha pozisaun daruak ho totál pontu neen (6), rezultadu manán rua (2), VDL FC tenke okupa pozisaun daneen (6), rezultadu manán ida (1) no lakon ida (1).
Entretantu, Akadémika FC okupa iha pozisaun dalimak, rezultadu manán ida (1) no lakon ida (1), enkuantu Kulugisa FC iha pozisaun zona mean (dasiak) hafoin derrota rua (2) husi jogu rua (2).
Jornalista: Natalino Belo
Editór: Xisto Freitas da Piedade
