DILI, 27 Outubru 2025 (TATOLI)—Rezultadu jogu jornada daruak primeira divizaun Liga Futeból Femininu Timor-Leste (LFFTL) ekipa AD SLB gaña pontu tolu husi Na’in-Feto FC, enkuantu Maudoko FC impata ho Maranatha FC.
Ekipa rua hala’o jogu iha Estádiu Munisipál Dili, Sábadu, 25 Outubru iha-ne’ebé ekipa AD SLB manán Na’in-Feto FC ho skor 11-0.
Golu hirak-ne’e AD SLB prodús iha primeira parte ho skor 6-0 liuhosi Jogadora sira hanesan Maria Conceição iha minutu 20 no 44, Natacia Alves iha minutu 23, Astari 27 no Vanesa iha minutu 34 no 39.
Golu lima seluk prodús iha segunda parte liuhosi Jogadora sira hanesan Maria Conceição iha minutu 53 no 62, Vanesa 85, Brígida 88 no Júlia Belo iha minutu 89.
Enkuantu, ekipa Maudoko FC obrigadu tenke fahe pontu ho Maranatha FC iha-ne’ebé ekipa rua ramata jogu ho skor 1-1.
Jogadora na’in-rua mak prodús golu iha jogu referidu. Husi ekipa Maudoko enxe husi Jogadora Anisya iha minutu 19 no Maranatha liuhusi Jogadora Nafa Rina iha segunda parte minutu 54.
Ho rezultadu jogu entre ekipa haat referidu, AD SLB okupa iha pozisaun dahuluk ho totál pontu neen (6) husi jogu rua, Na’in-Feto kontinua iha pozisaun dasanuluk ho pontu 0 husi jogu rua (2).
Entretantu, Maudoko rekolla pontu haat (4), rezultadu husi manán ida (1) no impata ida (1), enkuantu Maranatha mantein iha pozisaun hitu (7) ho pontu ida (1) husi jogu rua iha-ne’ebé manán ida (1) no lakon ida (1).
Jornalista: Natalino Belo
Editór: Xisto Freitas da Piedade
