DILI, 27 Outubru 2025 (TATOLI)-Sekretária Estadu Formasaun Profisionál no Empregu (SEFOPE) aprezenta proposta Orsamentu Jerál Estadu (OJE) 2026 ho montante hamutuk millaun $9,4 ba Komisaun D trata Asuntu Ekonomia no Dezenvolvimentu iha Parlamentu Nasionál.
“Orsamentu ba 2026, iha programa formasaun, oinsá atu fó apoiu ba sentru formasaun akreditadu, sentru formasaun rejistadu lisensa operasionál, nune’e ita-nia joven sira hetan oportunidade tuir formasaun [hodi] kompete iha merkadu”, Sekretáriu Estadu Formasaun Profisionál no Empregu, Rogério Mendonça, hateten hafoin audiénsia públika iha Parlamentu, ohin.
Nia admite katak nesesita duni formasaun kontínua hodi responde ba demanda merkadu ne’ebé agora presiza númeru barak, liuliu bá rai-li’ur. “Hanesan Nova Zelándia, pilotu ne’ebé mak primeiru ita haruka iha Novembru iha ema 11, maibé merkadu boot tebetebes, hakarak rihun 27. Entaun, oinsá prepara kondisaun di’ak iha tinan ida primeiru hodi haruka traballadór no parte empregadór sira fiar katak ita-nia traballadór timoroan di’ak. Iha futuru mai hakarak halo rekrutamentu ne’ebé boot liu ba ita-nia traballadór sira”, nia dehan.
Aleinde ne’e kontinua formasaun ba traballadór sira bá iha Austrália no Koreia do Súl.
Tuir livru proposta OJE 2026, orsamentu ba SEFOPE aloka millaun $3,414 ba saláriu no vensimentu, $4,637.804 ba bens no serbisu, $947.959 ba transferénsia públika, $489.475 ba kapitál dezenvolvimentu.
Husi orsamentu ne’e finansia programa haat mak Programa Dezenvolvimentu Rurál no Urbanu ho subprograma reforsa serbisu SEFOPE iha munisípiu no esteriór, no ninia atividade ida.
Programa Funsionamentu no Dezenvolvimentu Instituisionál ho subprograma tolu no atividade 14. Programa Inkluzaun Sosiál ho subprograma ida no atividade ida.
Programa Investimentu no Diversifikasaun Ekonómika ho nia subprograma neen – estratéjia nasionál empregu, informasaun nasionál kona-ba mão-de-obra no merkadu, kria oportunidade empregu, sertifikasaun instituisaun sentru formasaun, infraestrutura no fasilidade ba formasaun profisional no empregu, inklui edifísiu públiku, relasaun traballu no ninia atividade hamutuk 28.
Governante ne’e relata katak ezekusaun OJE 2026 husi SEFOPE atinje ona 71% husi montante inisiál millaun $8,4.
Jornalista: Nelson de Sousa
Editora: Maria Auxiliadora
