PM Xanana : Agradese ba povu Malázia no Estadu Membru ASEAN
KUALA LUMPUR, 27 outubru 2025 (TATOLI)— Primeiru-Ministru Timor-Leste, Kay Rala Xanana Gusmão lori Governu no povu Timor-Leste nia naran, hato’o agradesimentu profundu ba Governu no povu Malázia nomos ba Estadu Membru ASEAN hotu ne’ebe simu Timor-Leste iha família boot ASEAN.
“Lori Governu no povu Timor-Leste nia naran, hau dala ida tan hato’o ami nia agradesimentu profundu ba Governu no povu Malázia nomos ba Estadu Membru ASEAN hotu ne’ebe simu ami iha família boot ida-ne’e,” dehan PM Xanana iha Serimonia Resepsaun Almosu oferese hosi Timor-Leste, ba iha Okazaun Timor-Leste nia adezaun hanesan Membru ASEAN ba 11.
Serimonia Resepsaun Almosu ne’ebe halao iha Sentru Konvensaun Kuala Lumpur (KLCC), Malaysia, Segunda (27/10).
Iha serimonia ne’e, hola parte direita hosi Primeiru-Menteri Malaysia, Dato’ Seri Anwar Bin Ibrahim, hamutuk ho lideransa membru ASEAN inklui mos Sekretáriu-Jerál Nasoins Unidas, António Guterres nomos lideransa hosi nasaun seluk.
“Hanesan ha’u hato’o ona iha ha’u nia diskursu horisehik iha asinatura Deklarasaun Adezaun Timor-Leste ba ASEAN, nu’udar marka loron ne’ebé sei hanoin nafatin iha istória Timor-Leste nian no ita-nia rejiaun,” dehan PM Xanana.
Primeiru-Menteri Malaysia nu’udar mos Prezidenti ASEAN, Dato’ Seri Anwar Bin Ibrahim dehan almosu ne’e oferese husi Governo Timor-Leste mak organiza. “Obrigado, Prezidente Ramos-Horta, no obrigado, Primeiru Ministru Xanana Gusmao,no sira hotu ne’ebé prezente,” dehan PM Malaysia.
“Ami, fraternidade Komunidade ASEAN haksolok ho adezaun Timor-Leste nudar Membru ba dala 11 husi ita-nia Komunidade ASEAN ne’ebé boot. No, klaru, hodi ha’u nia naran kolega sira, ami bele garante ba ita boot sira, ami sei konsidera ita boot sira hanesan reál, funsional, dan efetivu nu’udar parseiru,” hatete Xefi Governu ne’e.
“Ami komprende ita-boot nia susar sira, ami komprende ita-boot nia esperansa no aspirasaun sira, no husik ita hamutuk no harii hamutuk ASEAN ida ne’e. No obrigado dala ida tan ba ita-boot nia vontade atu konsidera no adota kondisaun hotu-hotu ne’ebé maka impoin iha korredór sira,” deklara PM Malaysia ne’e.
Timor-Leste ofisialmente sai membru ASEAN (Asosiasaun Nasaun Sudeste Aziátiku) ba 11, iha dadeersan loron 26 outubru 2025, ne’ebé ratifika ho serimónia asinatura Deklarasaun Adezaun Timor-Leste ba ASEAN.
Ofisilamente Timor-Leste sai membru plenu ba ASEAN liu hosi asina deklarasaun hosi nasaun membru ASEAN mak hanesan, Primeiru Ministru Malázia, Datuk Seri Anwar Ibrahim, Sultan Brunei Darussalam, Sultan Hassanal Bolkiah, Prezidente Repúblika, Prabowo Subianto, Primeiru Ministru Laos, Sonexay Siphandone, Primeiru Ministru Singapura, Lawrence Wong, Primeiru Ministru Tailándia, Anutin Charnvirakul, Myanmar, Primeiru Ministru Kamboja, Hun Manet, Primeiru Ministru Lao PDR, Primeiru Ministru Vietnam, Phan Minh Chin no ikus asina hosi Primeiru Ministru Timor-Leste, Kay Rala Xanana Gusmão.
Jornalista : Anito Soares
Editora : Armandina Moniz
