OEKUSI, 27 Outubru 2025 (TATOLI) – Primeiru-Ministru, Kay Rala Xanana Gusmão, fó ona pareser ba Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, kona-ba projetu suspendidu sira hamutuk 154 ne’ebé antes ne’e suspende husi Autoridade Sesante sira, hodi haree ba nia legalidade bazea ba programa orsamentu nian.
“Antes ne’e, Autoridade sira suspende projetu 154, tanba haree legalidade no alokasaun orsamentu, tanba orsamentu bazea ba programa, maibé foin daudaun ha’u rasik konsulta asuntu ne’e, no halo karta ida ba Primeiru-Ministru, no Primeiru-Ministru mós fó ona pareser ida pozitivu atu haree, maibé nafatin konsidera obedesimentu ba regra no prosedimentu legál ne’ebé orsamentu koloka mai RAEOA,” nia informa ba jornalista sira iha Oekusi.
Notísia rentretantu:Autoridade RAEOA hahú rezolve projetu pendente, extensaun, inklui estrada Tono ba Oésilo
Autoridade ne’e hateten, Governu Sentrál entrega kompeténsia ba RAEOA, atu haree ho prudénsia kumprimentu ba lei, maibé RAEOA kategoriza iha tolu, husi projetu hotu ne’ebé suspende antes ne’e, iha karatér tolu, ida mak identifikadu ona ba projetu sira-ne’ebé konsidera hanesan urat nadi ka raan ba ema hotu atu asesu, daruak mak proseju emerjénsia sira-ne’ebé urjente ba nesesidade povu, datoluk mak kategória trajetóra, katak harii agora, signifika tinan oin sei kompleta nesesidade infraestrutura bázika, prinsipál no determinante nune’e bele tama ona zona ekonómia espesiál.
“Ami kompromete katak, to’o meiadu 2026 infraestrutura bázika determinante sira atu fasilita komunidade atu asesu ba merkadu sira, tenki remata, ne’ebé projetu suspendidu sira 154 ne’e sei kontinua, maibé kumprimentu ba lei, tenke la’o nafatin,” nia hateten.
Notísia rentretantu:Rogério Lobato suspende projetu emerjénsia 154 ne’ebé simu ona orden serbisu
Entretantu, Antes ne’e Prezidente Autoridade ezoneradu, Rogério Tiago de Fátima Lobato, deside hasai karta ofisiál ida hodi suspende projetu emejénsia ne’ebé antes ne’e selebra ona orden serbisu iha loron 10 Jullu 2025 entre Konsellu Administrasaun Fundu Infraestrurura (KAFI) ho empreza sira.
Dokumentu ofisiál ne’ebé Ajénsia Tatoli,I.P, iha segunda-feira ne’e, karta suspensaun ne’e, asina husi Prezidente Autoridade ezoneradu, Rogério Tiago de Fátima Lobato, iha loron 25 Agostu 2025, ho númeru reff. 454 / PA/RAEOA-TL/ VIII / 2025, hodi suhu ba emprezáriu lokál no nasionál sira ho asuntu suspensaun ba projetu emerjénsia KAFI dahaat no dalima.
“Bazea ba despaxu, Primeiru-Ministru ho númeru 014/PM/VII/2025 determina limite ba atuasaun administrativa RAEOA, hodi limite prosedimentu aprovizionamentu ba bens serbisu no obra públika no jestaun korente iha Oekusi, eseptu hetan autorizasaun husi Súa Excelênsia Primeiru-Ministru,” sita iha dokumentu ofisiál ne’ebé Ajénsia Tatoli.
Iha karta ne’e mós, husu ba empreza ne’ebé mobiliza ona ekipamentus no materiál tenki pouza hodi hein desizaun no autorizasaun husi Primeiru-Ministru mai Prezidente Autoridade RAEOA foun.
Notísia relevante:PA RAEOA konsidera suspensaun projetu emerjénsia 154 iha Oekusi legál
Jornalista: Abílio Elo Nini
Editór: Rafael Ximenes de A. Belo
