Rogério Lobato suspende projetu emerjénsia 154 ne’ebé simu ona orden serbisu
OEKUSI, 01 Setembru 2025 (TATOLI) – Prezidente Autoridade ezoneradu iha Rejiaun Administrativa Espesiál Oekusi Ambeno (RAEOA), Rogério Tiago de Fátima Lobato, deside hasai karta ofisiál ida hodi suspende projetu emerjénsia ne’ebé antes ne’e selebra ona orden serbisu entre Konsellu Administrasaun Fundu Infraestrurura (KAFI) ho empreza sira.
Notísia relevante: Autoridade RAEOA atribui orden servisu ba empreza 154 implementa projetu KAFI
Dokumentu ofisiál ne’ebé Ajénsia Tatoli,I.P, asesu iha segunda-feira ne’e, karta suspensaun ne’e, asina husi Prezidente Autoridade RAEOA, Rogério Tiago de Fátima Lobato, iha loron 25 Agostu 2025, ho númeru reff. 454 / PA/RAEOA-TL/ VIII / 2025, hato’o ba emprezáriu lokál no nasionál sira ho asuntu suspensaun ba projetu emerjénsia KAFI dahaat no dalima.
“Bazea ba despaxu, Primeiru-Ministru ho númeru 014/PM/VII/2025 determina limite ba atuasaun administrativa RAEOA, hodi limite prosedimentu aprovizionamentu ba bens serbisu no obra públika no jestaun korrente iha Oekusi, ezetu hetan autorizasaun husi Sua Exelénsia Primeiru-Ministru,” sita iha dokumentu ofisiál ne’ebé Ajénsia Tatoli asesu, ohin.
Liuhosi biban ida-ne’e, Prezidente Autoridade husu ba empreza ne’ebé mobiliza ona ekipamentu no materiál tenke pauza hodi hein desizaun no autorizasaun husi Primeiru-Ministru mai Prezidente Autoridade RAEOA foun.
Notísia relevante:Ba estrutura foun, Rogério Lobato: “Haree ema hotu hanesan timoroan”
Entretantu, antes ne’e Autoridade RAEOA hamutuk ho Diresaun Rejionál Infraestrutura (DRI) no Ajénsia Dezenvolvimentu Nasionál Institutu Públiku (ADN, I.P), entrega orden servisu ba empreza 154 iha loron 10 Jullu 2025 atu implementa.
Iha biban ne’e, Diresaun Rejionál Infraestrutura, Remígio Nuno Sila, informa, empreza 154 ne’e, balun maioria Oekusi-oan no balun mai husi rai bo’ot.
Nia esplika, orden servisu ne’e fahe ba empreza sira, atu halo preparasaun, kona-ba mobilizasaun materiál, prepara traballadór, prepara fatin iha terrenu tenke hahú ona, hodi halo selebrasaun kontratu.
Notísia relevante:KM aprova rezolusaun ezonera Prezidente-membru autoridade RAEOA iha 31 Agostu
Enkuantu, projetu emerjénsia 154 ne’e, maioria reabilitasaun estrada rurál, tuir mai protesaun morru ka gabiaun atu proteje natar, to’os, eletrisidade, tanba fatin balun iha sub-rejiaun sira seidauk asesu ahi.
Entretantu, Ajénsia Tatoli, tenta konfirma asuntu ne’e ho Prezidente Autoridade RAEOA, Rogério Tiago de Fátima Lobato, maibé laiha fatin tanba daudaun ne’e fila ona ba Dili. Nune’e Xefe Gabinete Prezidente Autoridade RAEOA, Ivo Gunner Tilman, klarifika katak, razaun suspensaun ne’e tanba mandatu termina ona.
“Ami selebra ona hand-over, Prezidente mai tiha ona iha Dili, ne’ebé karta ne’e halo no asina ona iha loron 25 Agostu 2025,” nia informa ba Ajénsia Tatoli via telefonika, ohin.
Entretantu, durante mandatu tinan ida-resin, implementa projetu KAFI dahuluk konsege ezekuta projetu hamutuk tolu (3), KAFI daruak ezekuta projetu ualu (8) projetu lima kona-ba reabilitasaun estrada rurál sira, ponte rua no gabiaun ida no KAFI datoluk mak ezekuta projetu 27.
Notísia relevante:KAFI Oekusi aprova projetu emerjénsia 26 ho kustu millaun $36-resin
Jornalista: Abílio Elo Nini
Editór: Rafael Ximenes de A. Belo
