OEKUSI, 06 Outubru 2025 (TATOLI) –Iha fulan-Outubru ne’e nia laran, hahú rezolve ona projetu pendente 17, projetu extensaun ualu inklui projetu estrada nasionál kilometru 17 husi terminál Tono liga ba sub-rejiaun Oésilo, Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, informa.
Tuir dadus ne’ebé Ajénsia Tatoli,I.P asesu, pedidu pagamentu ba projetu pendente iha Gabinete Prezidente Autoridade (GPA) RAEOA hamutuk 17, komposta husi re-apropriasaun 15 no Fundu Espesiál Dezenvolvimentu (FED) 2025 nian rua (2), husi Ajénsia Dezenvolvimentu Nasionál (ADN) tolu (3), no mós pedidu extensaun pendente iha GPA hamutuk ualu (8) konstituídu hosi re- apropriasaun neen (6) no projetu emerjénsia rua (2).
Kona-ba atualizasaun pagamentu sira ba kapitál dezenvolvimentu millaun $2,977,501.95 komposta husi projetu re-apropriadu selu ona millaun $1,536,098.53 sei pendente hela millaun $1,441,403.43.
Notísia relevante:Rogério Lobato suspende projetu emerjénsia 154 ne’ebé simu ona orden serbisu
Kona-ba Fundu Espesiál Dezenvolvimentu (FED) ba projetu estrada pakote II husi terminál Tono ba sub-rejiaun Oésilo, selu ona IPC-5 millaun $1,206,055.48 sei pendente hela millaun $1,202,293.76 husi totál milaun $2,408,349.24.
“Ami enkontru ho Primeiru-Ministru, iha loron 01 Setembru 2025 fulan kotuk, fó hela minutas ida mai ho orden atu haree lalais, entaun bainhira ami tama eskritóriu, iha primeira semana, ami hetan lista pendente rua, ida-ne’ebé pendente hela iha sistema JRP (Joint Requirements Planning), ida seluk pendente hela ein-prosesu iha aprovizionamentu, agora iha fulan-Outubru ne’e, ita hahú rezolve,” nia dehan ba jornalista iha Oekusi.
Maibé, autoridade ne’e dehan, iha fulan-Setembru, dentru fulan ida hotu ona, dokumentu barak, aprovizionamentu mós la halo, maibé nu’udar ezekutivu, halo kuriozu, tenki haree, husu justifikasaun, ida-ne’ebé la klaru, enkamiña ba jurídiku ho sub-instituisaun relevante atu klarifika, liu-liu progresu serbisu, valór kontratu, ajudikasaun direta, nune’e haree atu defende no promove boa-governasaun, akontabilidade ida-ne’ebé ampla, entre Autoridade ho parseiru estratéjiku sira hotu, atu parseiru (stakeholder) sira haree Oekusi modelu dezenvolvimentu ida-ne’ebé fó benefisíu ba ema hotu.
Líder másimu RAEOA ne’e énfaze, kona-ba ezekusaun Orsamentu Jerál Estadu (OJE) 2025 nian, nia parte rejeita fó detalla tanba seidauk asesu sistema Joint Requirements Planning (JRP) nian.
“Ha’u sei bele pronúnsia bainhira ha’u haree sistema JRP. Maibé, ha’u bele dehan katak ha’u asina proposta pagamentu pendente iha JRP nian, to’o horsehik mós ha’u tuun direita ba iha diresaun ligadu ba ezekusaun ba projetu investimentu infraestrutura, atu haree lalais, tanba kompromete komesa husi loron 01 Outubru pagamentu ne’e, tenke hahú sai ona,” perante profisionál komunikasaun sosiál sira iha Oekusi, ohin, nia dehan.
Tuir nia, pagamentu tenke prosesa, nune’e bele hasa’e taxa ezekusaun orsamentu 2025 nian bele krexe (sa’e), ita kompromete se sistema pagamentu sentrál nian, taka iha loron 14 Novembru 2025, RAEOA nian mós tenke apar atu hanesan.
“Entaun, atu paga ema ba parsériu estratéjiku sira-nia konta, depois 30 Novembru, ne’e buat seluk fali ona, tanba serbisu administrasaun tékniku atu bele halo, maibé ita kompromete atu konjuntura deadline (prazu) husi nasionál, kona-ba pagamentu pendente obrigasaun Governu ba ita-nia ekonomia ba parseiru estratéjiku ne’ebé halo no hamutuk dezenvolve Oekusi ne’e,” nia katak.
Notísia relevante:PA RAEOA orienta empreza Samhee reaprezenta BoQ atu kontinua projetu edifísiu administrasaun
Entretantu, iha dokumentu minutas ne’ebé atribui husi Primeiru-Ministru ba Autoridade RAEOA, prevista iha prioridade daneen kona-ba kapitál dezenvolvimentu, tenke halo pagamentu ba projetu on-going (la’o hela) hamutuk 136 iha RAEOA ne’ebé aprezenta lista fornese ba Ajénsia Dezenvolvimentu Nasionál (ADN), pagamentu ba projetu husi FED hamutuk projetu 39 aprezenta lista fornese ba ADN, pagamentu ba grande projetu rua (2) aprezenta lista fornese ba ADN, fornese lista projetu emerjénsia.
Nune’e mós ba dívida sira, propoin atu identifika lista dívida, ekipa nasionál apoia ekipa ba estrutura tranzitóriu RAEOA kompostu husi, Ministériu Finansa (DJPO, DJT no AA), Komisaun Funsaun Públika (CFP) forsa traballu, MPIE no ADN.IP, ekipa referida sei dezloka ba RAEOA iha loron 07 to’o 11 Setembru 2025.
Notísia relevante:PM Xanana atribui prioridade neen ba PA RAEOA ezekuta durante fulan tolu
Jornalista: Abílio Elo Nini
Editór: Rafael Ximenes de A. Belo
