OEKUSI, 05 Setembru 2025 (TATOLI) – Primeiru-Ministru, Kay Rala Xanana Gusmão, atribui programa prioridade neen ba Prezidente Autoridade Autoridade Rejiaun Administrativa Espesiál Oekusi Ambeno (RAEOA), Régio da Kruz Salu, atu ezekuta durante mandatu fulan tolu, hahú husi loron 01 Setembru to’o 30 Novmebru 2025.
Notísia relevante:Autoridade RAEOA hasai sirkular ezonera kargu xefia sira
Prioridade neen ne’ebé mak Xefe Governu atribui ba Prezidenete Autoridade foun ne’e, ho objetivu atu asegura funsionamentu administrasaun públika iha Oekusi.
Prioridade primeiru mak, tenke asegura serbisu prioridade sira to’o loron 31 Dezembru 2025, planeamentu no orsamentu tinan 2026, indentifika problema difikuldade sira no aprezenta fila-fali iha loron 07 to’o 11 fulan Setembru 2025, tanba funsionamentu RAEOA hanesan mós munisipíu sira seluk nu’udar parte integrante husi Timor-Leste no Zona Ekonómia Espesiál Dezenvolvimentu Oekusi Ambeno (ZEEDOA) parte integrante husi RAEOA.
Prioridade daruak , mak konsulta ho Baze Legál sira, hanesan iha rezolusaun Governu númeru 36/2025, loron 28 fulan-Agostu, kona-ba ezonerasaun estrutura tuan, rezolusaun númeru 37/2025, loron 28 fulan-Agostu, kona-ba nomeasaun estrutura foun, rezolusaun númeru 38/2025, loron 28 fulan-Agostu, kona-ba prosede estinsaun Koordenadór-ZEEDOA, ba kargu xefia sira-ne’ebé la temi iha rezolusaun iha leten, Prezidente Autoridade sei nomeia pontu fokál ba serbisu idak-idak.
Prioridade datoluk, kona-ba saláriu no vensimantu, tenke hala’o ezersisíu interna hodi asegura saláriu to’o fulan-Dezembru no identifika defise ho surplus, reve kontratu no termu referénsia ba funsionáriu kazuál ho nível no la ho nível (naun-nível).
Nomeasaun politíka, asesória nasionál no internasionál hodi identifika sira-nia atribuisaun esensiál hodi kontribui ba funsionamentu instituisaun to’o loron 31 Dezembro ka lae? Durante périodu tranzitóriu laiha rekrutamentu funsionáriu foun ho kualker termu kontratu, ezepsaun ba serbisu apoiu ba estrutura foun tuir nesesidade, hapara asesória sira hotu tantu nasionál no internasionál.
Notísia relevante:PA RAEOA sei estabelese grupu tékniku aselera podér lokál no desentralizasaun
Prioridade dahaat kona-ba bens no serbisu korrente, atu identifika kontratu serbisu ezistente ein-partikulár ba serbisu esensiál sira hanesan; catering sira iha ospitál, fronteira no eventu), fornesimentu kombustivél jeradór power plant, fornesimentu kombustível veíkulu ba serbisu operasionál, fornesimentu serbisu limpeza no seguransa, fornesimentu serbisu komunikasaun pulsa telefone no internet.
Nune’e mós, manutensaun ba edifisíu no veíkulu, fornesimentu konsumu médiku no medikamentu, manutensaun ekipamentu médiku, fornesimentu materiál agrikola, fornesimentu materiál ba ezame nasionál, formasaun espesializada ba profesór sira, fornesimentu blanku sertidaun moris, mate, kaben, rejistu kriminál, billete identidade, fornesimentu karta kondusaun ba sinál no xapa matrikula, manutensaun ekipamentu pezadu, fornesimentu pesa ba SAS, manutenaun liña eletrisidade no fornesementu pesa EDTL no manutensaun ba portuáriu.
Prioridade dalima kona-ba transferénsia públika – iha transferénsia públika, fó atensaun ba, merenda eskolár no konsesaun sskolár, pagamentu subsidíu lideransa komunitáriu, serbisu operasionál suku no funsionáriu suku, pagamentu rai afetadu, bolsa estudu husi Fundu Espesiál Dezenvolvimentu (FED), transferénsia ba sentru formasaun bansone husi FED, subvensaun públika ba sosiedade sívil, subvensaun públiku ba komunidade agrikultór sira no subvensaun ba aero Dili husi FED.
Prioridade daneen kona-ba kapitál dezenvolvimentu, tenke halo pagamentu ba projetu on-going (la’o hela) hamutuk 136 iha RAEOA ne’ebé aprezenta lista fornese ba Ajénsia Dezenvolvimentu Nasionál (ADN), pagamentu ba projetu husi FED hamutuk projetu 39 aprezenta lista fornese ba ADN, pagamentu ba grande projetu 2 aprezenta lista fornese ba ADN), fornese lista projetu emerjénsia.
Nune’e mós ba dívida sira, propoin atu identifika lista dívida, ekipa nasionál apoia ekipa ba estrutura tranzitóriou RAEOA kompostu husi, Ministériu Finansa (DJPO, DJT no AA), Komisaun Funsaun Públika (CFP) forsa traballu, MPIE no ADN.IP, ekipa referida sei dezloka ba RAEOA iha loron 07 to’o 11 Setembru 2025.
Notísia relevante:PA RAEOA konsidera suspensaun projetu emerjénsia 154 iha Oekusi legál
Tan ne’e, Prezidente Autoridade Rejiaun Administrativa Espesiál Oekusi Ambeno (RAEOA), Régio Servantes Romeia da Cruz Salu, konsidera atribuisaun ne’e, nu’udar poténsia Governu no Estadu nian, nune’e presiza halais iha périodu tranzisionál.
“Rezolusaun ne’e, nomeia fila-fali Prezidente Autoridade ho membru autoridade ba périodu tranzisionál, ami mai ho lideransa sira hanesan poténsia no rekursu poténsia Estadu iha Oekusi, atu ita halo serbisu ida, tanba iha rezolusaun dehan fulan tolu, maibé se ita konkorda no konsiente ho poténsia ne’e, ita bele habadak périodu tranzisionál, nune’e ita-bele implementa lalais, nu’udar poténsia Governu no Estadu iha kontextu ne’ebé atribui iha rezolusaun ne’e,” nia hateten.
Jornalista: Abílio Elo Nini
Editór: Rafael Ximenes de A. Belo
