OEKUSI, 04 Setembru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio Servantes Romeia da Cruz Salu, kinta ne’e, hasai karta sirkular ida ho númeru reff, 02/GAB/PA/RAEOA-TL/IX/2025, ho asuntu atu hakotu (cessasaun) ba kargu xefia sira, hanesan xefe departementu diretór rejionál husi estrutura sesante nian.
Notísia relevante:KM aprova rezolusaun ezonera Prezidente-membru autoridade RAEOA iha 31 Agostu
Jornalista Ajénsia Tatoli,I.P asesu karta ne’e sita pontu importante haat mak hanesan:
- Bazea ba terseira alterasaun lei númeru 018/2023, loron 30 Novembru, alterada husi lei númeru 3/2014, loron 18, Juñu, ne’ebé kria RAEOA, liu-liu iha artigu 18.o haktuir katak, Prezidente Autoridade nu’udar reprezentante másimu Rejiaun, respondendu perante Primeiru-Ministru.
- Artikula funsionamentu kompeténsia Prezidente Autoridade RAEOA iha dekretu-lei númeru 5 /2015, loron 22 Janeiru, kona-ba estatutu RAEOA, ne’ebé previstu iha artigu 24.o, númeru 1. alinea A katak, Prezidente mak dirije no reprezenta hafoin afirma liután iha númeru 2 alinea R katak, Prezidente Autoridade mak iha kompeténsia atu nomea no ezonera tuir observasaun prosedimentu legál, ba titular Cargos iha Administrasaun Públika Região nian hanesan Jestaun funsionamentu adekuadu ba servisu públiku.
- Bazea ba númeru 2 husi rezolusaun Governu númeru 37/2025, loron 28 Agusto, nomea ona kargu xefia sira hahú husi diretór jerál, no diretór rejionál sira.
- Tuir minutas enkontru koordenasaun, no orientasaun polítika husi Primeiru-Ministru no inklui Ministra Finansa iha pontu 2 alinea 2.4 katak ba kargu xefia sira-ne’ebé la mensiona iha Rezolusaun Govermu númeru 37/2025, loron 28 Agostu, sei nomeia pontu fokál ba ida-idak tuir nesesidade.
“Determina katak, husi konsiderasaun legál hirak neéebé sitadu iha leten, kapasidade hanesan katak Prezidente Autoridade RAEOA no mós nu’udar reprezentante másimu rejiaun nian, ne’ebé previstu iha artigu 18.o husi lei númeru 18/2023, loron 30 Novembru, alterada husi lei númeru 3/2014, loron 18 Juñu no previstu mós iha artigu 24.o, númeru 1 alinea a no númeru 2 alinea katak Prezidente Autoridade RAEOA iha kompeténsia atu nomea no ezonera tuir servisu no nesesidade administrasaun públika nian,” sita iha karta sirkulár ne’ebé Ajénsia Tatoli asesu, ohin.
Notísia relevante:PA RAEOA konsidera suspensaun projetu emerjénsia 154 iha Oekusi legál
Tanba ne’e, liuhusi sirkulár referidu, fó informasaun ba kargu xefia sira hotu katak estrutura kargu xefia hanesan diretór rejionál no xefi departamentu sira-ne’ebé nomea no pose tuir despaxu Prezidente Autoridade RAEOA sesante automatikamente cessa ka hakotu.
“Iha pontu primeiru husi klauzula anteriór katak, kargu xefia maske cessa ona maibé tenke mantein serbisu públiku hodi assegura funsionamentu institusionál to’o Prezidente Autoridade RAEOA halo nomeasaun foun tuir nesessidade no responsabilidade,” hakotu sirkulár ne’e.
Notísia relevante:Herculano Sousa prioriza asuntu tolu durante mandatu lidera ZEEDOA iha Oekusi
Antes ne’e, iha reuniaun Konsellu Ministru, kuarta (27 Agostu 2024) ne’e, Governu liuhusi reuniaun Konsellu-Ministru aprova projetu rezolusaun ba ezonera estrutura hahú husi Prezidente no membru autoridade Rejiaun Administrativa Espesiál Oekusi Ambenu (RAEOA) iha 31 Agostu 2025.
Durante reuniaun ne’e, Primeiru Ministru Kay Rala Xanana Gusmão aprezenta rezolusaun kona-ba Rejiaun Administrativa Espesiál Oekusi Ambenu (RAEOA) atu disolve komisaun ezekutiva ho hanoin atu estabelese Zona Ekonómika Espesiál Dezenvolvimentu Oekusi Ambenu (ZEEDOA).
Iha dokumentu ofisiál portál Governu deklara katak, Governu sei ezonera Prezidente no membru autoridade RAEOA nian hahú iha 31 Agostu 2025 no nomea estrutura foun ida hodi garante kontinuidade administrasaun nian hahú iha 01 Setembru 2025.
Aleinde ne’e, Governu mós nomea hotu estrutura husi kargu diresaun no xefia sira iha Rejiaun Administrativa Espesiál Oekusi Ambenu (RAEOA) mak hanesan:
Domingos Punef assume knaar nu’udar Diretár-Jerál Rejionál; José Tanessib Anuno nu’udar Diretór Rejionál Administrasaun; Augusto de Fátima Efi nu’udar Diretór Rejionál Planeamentu no Aprovisionamentu; Amâncio Aguido Punef nu’udar Diretór Rejionál Finansas; Merita Marques Caunan Lafo nu’udar Diretora Rejionál Saúde; Vicêncio Cono nu’udar Diretór Rejionál da Edukasaun no Solidariedade Sosiál.
Nune’e mós Governu nomea José Oki nu’udar Diretór Rejionál Agrikultura; Orlando Quelo nu’udar Diretór Rejionál Komérsiu no Indústria; Remígio Nuno Sila nu’udar Diretór Rejionál Infraestruturas; Domingos de Almeida nu’udar Diretór Rejionál Transporte no Komunikasaun; Carlos de Fátima de Almeida nu’udar Diretór Rejionál Juventude no Desportu; Anastásia Eni nu’udar Diretora Rejionál Turizmu, Arte no Kultura; José Ase Neno Colo, nu’udar Diretór Rejionál Terras no Propriedade no Herculano Sousa mak asume kargu hanesan Koordenadór ba Implementasaun Zona Ekonómika Espesiál Dezenvolvimentu Oekusi Ambenu (ZEEDOA).
Notísia relevante:Funsionamentu ofisiál mídia RAEOA desmanteladu
Jornalista: Abílio Elo Nini
Editór: Rafael Ximenes de A. Belo
