OEKUSI, 03 Setembru 2025 (TATOLI) – Koordenadór Zona Ekonomia Espesiál Dezenvolvimentu Oekusi Ambeno (ZEEDOA), Herculano Sousa, prioriza asuntu importante tolu durante lidera ZEEDOA iha iha Rejiaun Administrativa Espesiál Oekusi Ambeno (RAEOA) ho mandatu fulan tolu hahú husi 01 Setembru to’o 30 Novembru 2025.
“Prioridade saida mak ami halo durante mandatu fulan tolu, kuandu ita haree tempu ne’e limitadu tebes, se ita ko’alia kona-ba investimentu iha fulan tolu ne’e ita labele halo milagre, maibé tanba instituisaun foun, fulan tolu ne’e ami sei haree liubá estabelesimentu instituisaun, staff (funsionáriu) agora ha’u mesak, entaun ha’u tenke hahú instala ekipa liuliu rekursu umanu ba espesialista saida mak presiza, ida-ne’e prioridade primeiru,” nia dehan iha Oekusi, ohin.
Notísia relevante:KM aprova rezolusaun ezonera Prezidente-membru autoridade RAEOA iha 31 Agostu
Prioridade daruak, hametin liña kooperasaun no komunikasaun ho Prezidente Autoridade RAEOA, atu haree kona-ba rekursu umanu, orsamentu no patrimóniu, tanba daudaun ne’e ZEEDOA seidauk iha orsamentu rasik.
“Ami sei tutela nafatin ba Prezidente Autoridade, intermus finansiamentu, lojístika, apoia administrasaun. Tan ne’e mak ami sei iha fulan tolu ne’e, ha’u ho Prezidente Autoridade tenke ko’alia didi’ak atu asegura katak ZEEDOA sei iha rekursu duni atu funsiona implementa saida mak halo iha fulan tolu ne’e,” nia dehan.
Datoluk mak, sei haree liu ba enkuadramentu legál sira, ida-ne’e importante tanba estrutura foun ZEEDOA to’o agora seidauk halo buat ida inklui seidauk hetan alokasaun orsamentu, tanba seidauk hetan identidade jurídiku ba instituisaun ZEEDOA.
“Tan ne’e mak ami sei kontinua komunika ho tutelár ho Primeiru-Ministru, atu haree kona-ba kestaun ne’e, sein baze legál, sei laiha orsamentu rasik no laiha atividade, maibé ha’u fiar katak, Primeiru-Ministru sei haree ida-ne’e, tanba sira mak estabelese instituisaun ne’e, hein katak iha tempu-badak, molok fulan tolu ramata, ami hetan ona klareza kona-ba estatutu legál,” nia informa.
Notísia relevante:PM Xanana nomea Régio da Cruz sai Prezidente Autoridade RAEOA
Nia lembra, hafoin hetan konfiansa husi Konsellu-Ministru iha loron kuarta semana kotuk, 27 Agostu 2025, iha segunda-feira semana ne’e, entrutura foun, hala’o ona enkontru ofisiál ho Primeiru-Ministru, Kay Rala Xanana Gusmão iha Ministériu Finansa, hodi fó orientasaun prinsipál rua ba estrutura atu serbí ba povu Oekusi nu’udar timoroan hotu.
“Mensajen ne’ebé ami simu husi Primeiru-Ministru mak ne’e, tempu ona atu fó fiar ba rai na’in-duni, atu lidera rasik prosesu dezenvolvimentu, nune’e povu bele partisipa hodi sente benefísiu husi dezenvolvimentu ne’e, tan ne’e mak orientasaun prinsipál mak ne’e, Oekusi-oan rai na’in mak hatene problema saida mak akontese iha Oekusi, saida mak atu hato’o ba povu só Oekusi-oan mak bele hatene, tan ne’e mak Primeiru-Ministru hamenu fila-fila, tenke tau iha ulun no fuan, katak imi ba só halo buat rua de’it, serbí imi-nia povu no serbí ba imi-nia rai – ida-ne’e mak misaun bo’ot ida mai ami no ita hotu, oinsa ita-bele konkretiza ita-hotu nia mehi atu hasai Oekusi husi izolamentu,” nia katak.
Notísia relevante:Rogério Lobato suspende projetu emerjénsia 154 ne’ebé simu ona orden serbisu
Antes ne’e, iha reuniaun Konsellu Ministru, kuarta (27 Agostu 2024) ne’e, Governu liuhusi reuniaun Konsellu-Ministru aprova projetu rezolusaun ba ezonera estrutura hahú husi Prezidente no membru autoridade Rejiaun Administrativa Espesiál Oekusi Ambenu (RAEOA) iha 31 Agostu 2025.
Durante reuniaun ne’e, Primeiru Ministru Kay Rala Xanana Gusmão aprezenta rezolusaun kona-ba Rejiaun Administrativa Espesiál Oekusi Ambenu (RAEOA) atu disolve komisaun ezekutiva ho hanoin atu estabelese Zona Ekonómika Espesiál Dezenvolvimentu Oekusi Ambenu (ZEEDOA).
Iha dokumentu ofisiál portál Governu deklara katak, Governu sei ezonera Prezidente no membru autoridade RAEOA nian hahu iha 31 Agostu 2025 no nomea estrutura foun ida hodi garante kontinuidade administrasaun nian hahú iha 01 Setembru 2025.
Aleende ne’e, Governu mós nomea hotu estrutura husi kargu diresaun no xefia sira iha Rejiaun Administrativa Espesiál Oekusi Ambenu (RAEOA) mak hanesan:
Domingos Punef asume knaar nu’udar Diretár-Jerál Rejionál; José Tanessib Anuno nu’udar Diretór Rejionál Administrasaun; Augusto de Fátima Efi nu’udar Diretór Rejionál Planeamentu no Aprovisionamentu; Amâncio Aguido Punef nu’udar Diretór Rejionál Finansas; Merita Marques Caunan Lafo nu’udar Diretora Rejionál Saúde; Vicêncio Cono nu’udar Diretór Rejionál da Edukasaun no Solidariedade Sosiál.
Nune’e mós Governu nomea José Oki nu’udar Diretór Rejionál Agrikultura; Orlando Quelo nu’udar Diretór Rejionál Komérsiu no Indústria; Remígio Nuno Sila nu’udar Diretór Rejionál Infraestruturas; Domingos de Almeida nu’udar Diretór Rejionál Transporte no Komunikasaun; Carlos de Fátima de Almeida nu’udar Diretór Rejionál Juventude no Desportu; Anastásia Eni nu’udar Diretora Rejionál Turizmu, Arte no Kultura; José Ase Teno nu’udar Diretór Rejionál Terras no Propriedade no Herculano Sousa mak asume kargu hanesan Koordenadór ba Implementasaun Zona Ekonómika Espesiál Dezenvolvimentu Oekusi Ambenu (ZEEDOA).
Notísia relevante:Ba estrutura foun, Rogério Lobato: “Haree ema hotu hanesan timoroan”
Jornalista: Abílio Elo Nini
Editór: Rafael Ximenes de A. Belo
