OEKUSI, 11 Setembru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, orienta ona Empreza Samhee Konstruktions Ltd, atu reaprezenta fila-fali Bill of Quantity (BoQ) atu kontinua projetu konstrusaun edifísíu administrasaun Oekusi tanba obra referida abandona dezde 2018 to’o ohin loron.
Ezekutivu ne’e, hato’o nia orientasaun, bainhira hala’o enkontru koordenasaun ho Jestór Empreza Samhee Konstruktions Ltd, Park Dae Ho, iha salaun Gabinete Prezidente Autoridade RAEOA iha Oekusi, ohin.
“Ita konkorda ona iha buat rua de’it, Prezidente Autoridade sesante hateten katak, ita iha ona faze simu malu, nune’e ba oin halais projetu ne’e, entaun ami hasoru malu, sira (kompañia) mós konkorda ona, no tuir padraun norma legais, tenke la’o tuir. Ami konkorda atu kompañia bele hahú uluk ho reaprezenta BoQ no espresaun boa fé, katak ita lalais iha périodu kurtu, nu’udar autoridade ami hateten katak se bele karik Dezembru 2026 ou Fevereiru 2027, serbisu hotu tenke konsentra ona iha fatin ne’e,” nia dehan iha Oekusi, ohin.
Notísia relevante:Posibilidade, konstrusaun futuru edifísiu administrasaun Oekusi husi empreza Samhee hahú fali
Antigu-Sekretáriu Rejionál ba Asuntu Agrikultura ne’e lembra katak, antes ne’e Autoridade Sesante aprezenta ona kazu abandonadu ne’e iha tribunál, maibé ikus mai parte rua, entre empreza ho Autoridade aprezenta omologasaun hodi dada hikas keixa referida.
“Kona-ba kazu ne’e iha tribunál, agora laiha ona problema, tanba husi autoridade sesante rezolve ona buat balun. Sira (empreza) ejize ha’u tenke halo MoU ida, nune’e bele espresa katak, sira prontu, maibé ha’u rejeita, tanba dokumentu kontratu antes ne’e iha ona. Entaun, ami fó prazu semana rua, atu reaprezenta saida mak ami deside ona atu la’o tuir tarjet (alvu) ne’ebé propoin ona katak Dezembru 2026, tenke konkluídu, no inaugurasaun iha 2027,” nia hateten.
Notísia relevante:Tribunál Oé-Cusse fó paresér ba SAMHEE halo manutensaun ekipamentu pezadu
Jestór Empreza Samhee Konstruktions Ltd, Park Dae Ho, promete sei prepara no koordena ho tékniku sira, nune’e bele kumpre desizaun Autoridade RAEOA nian.
“Enkontru ohin ne’e, atu mai ko’alia oinsá ba negosiasaun tuirmai, atu kontinua projetu ne’e, maibé ida-ne’e depende ba desizaun husi Autoridade RAEOA no kompañia nia preparasaun, entaun negosiasaun ohin ne’e, Prezidente Autoridade husu atu buat hotu prepara didi’ak hodi hatama ba Autoridade RAEOA depois mak sei aprezenta fila-fali ba Primeiru-Ministru, tanba desizaun hotu tenke ba iha Primeiru-Ministru, ne’ebé ohin ne’e laiha buat foun ida, atu kontinua ou la’e, ne’e seidauk, ne’ebé ami sei koordena fali ho tékniku sira,” nia dehan iha Oekusi, ohin.
Notísia relevante:Konstrusaun edifísiu administrasaun RAEOA iha faze komunikasaun ho Tribunál
Entretantu, konstrusaun edifísiu administrasaun ne’e konstrui husi empreza Internasionál Samhee Construction Ltd, iha bairru Santa Rosa, aldeia Oésono suku Costa sub-rejiaun Pante Makasar, ho valór kontratu hamutuk millaun $10,900,033.37, orsamentu ne’e Autoridade RAEOA aloka husi Orsamentu Jerál Estadu (OJE) 2016 nian. Durante kontratu ba projetu ne’e kompañia hahú ezekuta iha loron 01 fevereiru 2017 no tenke termina fulan-agostu 2018.
Observasaun jornalista Ajénsia TATOLI, I.P, nota katak projetu ne’e, kontinua abandona maibé lutu halo metin ho kalen (zinku) no hetan seguransa másima husi seguransa sívil sira.
Jornalista: Abílio Elo Nini
Editór: Rafael Ximenes de A. Belo
