OEKUSI, 31 Jullu 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato, kuarta ne’e, hala’o vizita ofisiál ba iha Ministériu Públiku, no enkontru mós ho prokuradór sira inklui observa kondisaun edifísiu no serbisu administrasaun nian.
Iha ámbitu sorumutu ofisiál ne’e, Rogério Tiago Lobato, komunika kedas prokuradór sira, kona-ba kazu suspensaun ba projetu futuru edifísiu administrasaun nian, ne’ebé antes ne’e konstrui husi empreza internasionál Samhee husi nasaun Korea Súl.
“Ami hakarak hato’o katak kazu ba projetu edifísiu administrasaun ne’e, ami sei halo akordu ida empreza konstrutora Samhee, tanba administrasaun sira anteriór, hakotu ona kontratu ho empreza ne’e rasik, agora ami tenke negósia besik ona atu akordu, kuandu iha ona sei lori akordu ne’e ba iha tribunál Oekusi nian, atu fó omologasaun ba akordu ne’e,” Rogério Lobato dehan, iha ámbitu vizita ofisiál ba iha Ministériu Públika Oekusi.
Notísia relevante:Tribunál Oé-Cusse fó paresér ba SAMHEE halo manutensaun ekipamentu pezadu
Nia informa, bainhira tribunál Primeira Instánsia aseita hodi fó ona omologasaun ba akordu entre RAEOA ho empreza Samhee, entaun Autoridade RAEOA hanesan na’in ba obra referida, sei ba tan iha Ministériu Públiku, atu bele dada fali keixa, nune’e projetu edifísiu administrasaun bele kontinua fali.
Imajen TATOLI/Abílio Elo Nini
“Ha’u espera katak to’o fulan oin Setembru 2025 ne’e, ita bele hetan ona akordu entre Autoridade RAEOA ho empreza Samhee, atu bele dada hikas keixa iha Ministériu Públiku, atu kompañia bele kontinua serbisu, ne’ebé sei la halo konkursu foun maibé halo amandamentu foun ida iha kontratu ne’e, tanba atu fó fali ba kompañia foun, sei fadigadu liután,” nia informa.
Hafoin hato’o rekomendasaun sira-ne’e iha Ministériu Públiku, Koordenadór Prokuradór Repúblika Primeira Instánsia Oekusi, Mateus Nessi, klarifika kedas, katak kazu ne’e kuaze tinan ualu ona. Nune’e nia sei koordena ho responsavel ba kazu referidu bainhira hetan ona omologasaun husi tribunál.
“Kazu ne’e, la’ós ha’u mak kaer maibé kolega seluk, daudaun ne’e muda ona husi Oekusi, durante ne’e nia mak akompaña, ne’ebé bainhira tribunál halo ona omologasaun, bele entrega mai Ministériu Públiku, depois ami sei entrega ba responsavel kaer kazu ne’e atu hola desizaun,” nia dehan iha ámbitu enkontru ofisiál ne’e.
Notísia relevante:Konstrusaun edifísiu administrasaun RAEOA iha faze komunikasaun ho Tribunál
Entretantu, konstrusaun edifísiu futuru administrasaun ne’e konstrui hosi kompañia Internasionál Samhee Construction Ltd, iha bairru Santa Rosa, aldeia Oésono suku Costa sub-rejiaun Pante Makasar, ho valór kontratu hamutuk millaun $10,900,033.37, orsamentu ne’e Autoridade RAEOA aloka husi Orsamentu Jerál Estadu (OJE) 2016 nian. Durante kontratu ba projetu ne’e kompañia hahú ezekuta iha loron 01 fevereiru 2017 no tenke termina fulan-agostu 2018.
Observasaun jornalista Ajénsia Tatoli,I.P, nota katak projetu ne’e, kontinua abandona maibé lutu halo metin ho kalen (zinku) no hetan seguransa másima husi seguransa sívil sira.
Notísia relevante:Autoridade sei reanunsia konkursu públiku ba konstrusaun edifísiu administrasaun RAEOA
Jornalista: Abílio Elo Nini
Editór: Rafael Ximenes de A. Belo
