OÉ-CUSSE 10 maiu 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, informa, konstrusaun futuru edifísiu administrasaun RAEOA sei iha faze komunikasaunn tanba prosesu investigasaun sei iha Tribunál Oé-Cusse.
Notísia relevante: Konstrusaun edífisiu administrásaun RAEOA atinje ona 46%
Nune’e, nia hatete, bainhira prosesu konklui, autoridade sei halo re-anunsiu públiku hodi loke fali konkursu públiku ba konstrusaun ne’e, tanba planu no orsamentu autoridade ajenda ona iha tinan ne’e.
“Futuru edifísiu administrasaun RAEOA, agora iha faze komunikasaun ho tribunál, tanba uluk ita mak husu tribunál no Ministériu Públiku atu hasai kompañia ne’ebé mak ita termina kontratu, ita halo ona avaliasaun ba edifísiu ne’e, atu kontinua ita mós tau orsamentu ba tinan ida-ne’e,” Arsénio Paixão Bano, informa ba jornalista sira iha Oé-Cusse.
Notísia relevante: Tribunál Oé-Cusse fó paresér ba SAMHEE halo manutensaun ekipamentu pezadu
Tuir nia, sei bainhira prosesu tomak iha tribunál finaliza, entaun prosesu kontinuasaun ba konstrusaun ne’e bele hahú, maibé agora iha prosesu hela atu lori kompañia ne’e ba tribunál ba garantia, tanba ne’e interese RAEOA nian.
“Ha’u hakarak informa katak prosesu ne’e la’o hela, ita hakarak kompañia foun kuandu tama ne’e tenke ezekuta obra ho kualidade, kuandu prosesu hotu-hotu loos ona mak foin ita halo prosesu aprovizionamentu,” nia afirma.
Entretantu, edifísiu futuru administrasaun ne’e konstrui hosi kompañia Internasionál SAMHEE Construction Ltd, iha bairru Santa Rosa, aldeia Oésono suku Costa sub-rejiaun Pante Makasar, ho valór kontratu hamutuk $10,900,033.37, orsamentu ne’e Autoridade RAEOA aloka hosi Orsamentu Jerál Estadu (OJE) 2016 nian.
Durante kontratu ba projetu ne’e kompañia hahú ezekuta iha loron 01 fevereiru 2017 no tenke termina fulan-agostu 2018.
Notísia relevante: Autoridade sei reanunsia konkursu públiku ba konstrusaun edifísiu administrasaun RAEOA
Jornalista : Abílio Elo Nini
Editór : Evaristo Soares Martins
