DILI, 27 Outobru 2025 (TATOLI)-Tribunál Judisiál Primeira Instánsia Dili (TJPID), segunda ne’e aplika medida kausaun ba arguidu na’in-lima ne’ebé supeitadu lori osan no mina ilegál mai Timor-Leste.
Liuhusi Interrogatóriu dahuluk ne’ebé reprezenta husi Prokudór Rafael Gusmão promove arguidu sidadaun Indonézia na’in-lima ne’e ho krime deskaminu ne’ebé previstu no punidu iha artigu 317 husi Kódigu Penál Timor-Leste.
Tanba arguidu na’in-lima ne’e importa sasán hanesan mina no gazoel inklui osan ho montante $111.000 maibé la aprezenta ba iha Autoridade Aduaneiru (Alfándega) no Autoridade polisiál ne’ebé iha Fronteira Batugade.
Iha Kódigu Penál Timor -Leste artigu 317 sita katak:
1) Ema ne’ebé importa ka exporta bein ka merkadoria maibé sees-án tiha atu la selu totalmente ka parsialmente direitu ka taxa alfandegária ne’ebé nia tenke selu tanba merkadoria ne’e nia entrada ka saida sei hetan pena prizaun tinan 1 to’o tinan 4 ka multa.
2) Kuandu bein ka merkadoria iha valór aas-liu dolar amerikanu 10.000 ka ajente prátika faktu sira deskritu iha númeru anteriór abitualmente sei aplika pena prizaun tinan 2 to’o tinan 6 ka multa.
Nune’e iha interrogatóriu dahuluk ne’e, iha alegasaun Ministeriu Públiku nian solisita ba Tribunál aplika medida kausaun ba arguidu na’in-lima hodi husu selu multa ho valór osan hamutuk $11.0000. Kada ema ida selu multa $2.5000.
Tanba arguidu sira-nia hahalok ne’e lori sasán tama iha Autoridade Aduaneiru (Alfándega) no Autoridade polisiál ne’ebé iha Fronteira Batugade.
Perante iha interrogatóriu dahuluk, Defeza husi arguidu na’in-lima, Advogadu Privadu Pedro Camões husu Tribunál atu aplika multa ba nia kliente sira.
Hafoin Tribunál rona tiha parte hotu, Tribunál liuhusi juis estrajiáriu Lucas de Jesus Costa Pereira hasai despaxu hodi aplika medida kausaun ba arguidu na’in-lima hodi husu arguidu na’i- lima selu multa hamutuk $11.000.
Defeza husi arguidu na’in lima, Advogadu Privadu Pedro Camões, hateteten jornalista sira katak, Tribunál aseita tuir saida mak Ministériu Públiku iha nia alegasaun hodi aplika medida kausaun ba arguidu kada ema. No objetu apreendidu ne’ebé momentu autoridade halo apreensaun hanesan gazoel no gazolina ne’e hela ba Estadu.
“Arguidu sira livre husu medida koasaun sira seluk ne’ebé Tribunál hasai despaxu hodi aseita tuir Ministériu Públiku nia katak aplika medida kausaun ba kada arguidu sira ba krime deskaminu,” nia hateten.
Notísia relevante: Ekipa konjunta halo apreensaun ba kamioneta lima tula mina ilegál husi Atambua
Jornalista : Natalino Costa
Editór : Evaristo Soares Martins
