DILI, 23 Outubru 2025 (TATOLI)–Ekipa Konjunta ne’ebé kompostu husi Departamentu Servisu Investigasaun Kriminál no Unidade Polísia Marrítima, Servisu Nasionál Intelijénsia (SNI) no Autoridade Aduaneira (AA)/Alfándega inklui Ministériu Públiku (MP) halo apreensaun ba kamioneta lima iha Munisípiu Likisá tanba suspeitada hatama mina ilegál mai husi Atambua, Indonézia.
Ekipa halo apreensaun ne’e bainhira simu informasaun husi ekipa Servisu Intelejénsia sira iha fronteira Batugade, katak hafoin Autoridade Seguransa no Aduaneira Fronteira Batugade halo tiha pasa revista ba kamioneta lima ne’e, maibé sei deskonfia rai subar sasán balun iha laran.
Nune’e, bainhira ekipa atu halo tan pasa revista ba daruak, maibé kamioneta ne’e kondús ona ba parte intelelijénsia sira no informa kedan ekipa konjunta nune’e halo kedan apreensaun ba kamioneta lima iha área Likisá, iha Kuarta (22/10) tuku 13:00.
Portavós Komandu PNTL interinu, Superindente Polísia Mouzinho Correia hateten, Polísia Nasionál Timor-Leste (PNTL) liuhusi ekipa konjunta iha loron 22 Outubru horisehik halo apreensaun ba karreta Kamioneta lima ne’ebé deskonfia tula mina.
“Ekipa konjunta halo intervensaun no apreensaun ba karreta kamioneta lima husi Atambua. Karreta sira ne’e mamuk ho objetivu atu tula produtu lokál iha Dili laran, maibé iha tempu ne’ebé hanesan sira mós hatama mina gazoel no gazolina ilegál,” Mouzinho Correia informa ba Jornalista sira liuhusi konferénsia imprensa iha sala multimídia Ministériu Interiór, Vila-Verde, Kinta ne’e.
Tuir informasaun katak, kada karreta tula mina jerigen litru 30 ne’e iha sia.
Nia dehan, mina ilegál ne’ebé kamioneta lima hatama mai ne’e kompostu husi gazoel no gazolina no sasán sira ne’e subar iha karreta nia laran no hatama mai iha Timor-Leste nune’e ekipa konjunta konsege halo apreensaun.
Notísia relevante : PNTL Kovalima halo apreensaun sigarru ilegál kaisa 389
Komandante Mouzinho dehan, kamioneta lima ne’e sira mós lori ho osan ho montante boot.
Tanba ne’e, PNTL asegura evidénsia karreta kamioneta lima no osan nune’e prosesu la’o hela.
“Ema sira ne’ebé ho kareta kamioneta tula mina ne’e, sira-nia modus ne’e kapas, tanba karreta mai mamuk, maibé depois check, mina sira ne’e sira subar iha karreta sasis, se haree husi li’ur ne’e mina laiha, maibé haree didi’ak mina sira iha laran,” Mouzinho deklara.
Superintendent Asistente Polísia ne’e esplika, kamioneta lima ne’e tula osan ho montante $111.000, ne’ebé tuir loloos sira hetan deklarasaun husi Autoridade Indonézia no Timor-Leste, maibe realidade laiha deklarasaun ruma.
“Tuir indentifikasaun ne’ebé PNTL iha katak, osan referidu hatama mai Timor-Leste atu sosa produtu lokál sira hanesan kamii no nuu atu lori fila bá Atambua-Indonézia,” nia haktuir.
Maibé, maneira sira hatama osan ne’e la tuir prosedimentu legál tuir lei númeru 17/2011 nian kona-ba kombate brankamentu kapitál no finansimentu terrorizmu, tanba bazeia ba lei ne’e, katak bainhira atu lori osan osan $10.000 ba leten tenki deklara ba Autoridade Timor-Leste.
“Iha kazu ne’e laiha. Tanba ne’e Polísia Nasionál Timor-Leste halo ona detensaun ba sidadaun Indonézia na’in-lima ne’ebé nu’udar kondutór ba karreta kamioneta lima nomós halo indentifikasaun ba ema sira ne’ebe mak na’in ba osan ne’e iha Dili. PNTL mós preende mina sira ne’ebé sira hatama,” nia katak.
Razaun PNTL halo detensaun ba sidadaun Indonesia na’in-lima ne’e hodi halo indentifikasaun tanba iha prosesu ne’e fragante delitu.
Autoridade seguransa seidauk halo detensaun ba na’in ba karreta no sasán ne’e tanba fora husi fraglante delitu. Tanba ne’e, osan na’in seidauk halo detensaun, depende ba situasaun karik nia ne’e priense fragante delitu ka fora husi asaun ne’e.
“Se situasaun ne’e mak fora husi fragante delitu, entaun ita halo identifikasaun hodi lokaliza nia paradeiru hodi hato’o ba iha Ministériu Públiku para hasai mandadu detensaun. Tanba ne’e prosesu la’o hela, maibé ba sira na’in-lima ne’e ita halo detensaun. Enkuantu na’in ba osan ne’e halo indentifikasaun tanba la prense detensaun fragante delitu nian,” nia tenik.
Sidadaun Indonézia na’in-lima nu’udar kondutór ba karreta kamioneta lima ne’ebé hatama mina ho ilegál.
“Hakarak ka lakohi tenke selu taxa ba Estadu, maibé desvia ho dalan ilegál ne’ebé lei bandu. Nune’e mai to’o tiha ekipa foin halo apreesaun ba sira,” nia hato’o.
Jonalista : Natalino Costa
Editora : Julia Chatarina
